“Cola llibrería pretendemos dar un reblagu, una bona noticia, al mundu del asturianu y a Asturies”, diz Esther Prieto

|
“Cola llibrería pretendemos dar un reblagu, una bona noticia, al mundu del asturianu y a Asturies”, diz Esther Prieto

Ediciones Trabe recupera la so llibrería n’Uviéu, que va asitiase na sede nueva de la editorial na cai Fernando Alonso. La coopropietaria Esther Prieto afirma que con esta iniciativa “pretendemos dar un reblagu, una bona noticia, al mundu del asturianu y a Asturies”.

La casualidá quixo qu’una idea que venía rondando hai tiempu la cabeza de Prieto y del so sociu Samuel Castro, al frente de la editorial dende’l 2012, fixérase realidá. “Teníemos l’almacén con tolos llibros en Meres y la oficina n’Uviéu, en Foncalada, y queríemos buscar dalgo pa trayer l’almacén”, rellata.

Tres muncho mirar na ciudá y fuera, apaeció’l llocal de Fernando Alonso, un baxu asitiáu nel númberu 17 “grande, de 150 metros cuadraos, con un escaparate ampliu que, amás de p’almacén, yera perfeuto pa abrir una llibrería pa da-y una alegría a tol mundu y a nós mesmos”. Asina, depués del zarru de la de Trabe nel 2011 y d’otres llibreríes especializaes como Paraxuga, n’Uviéu, o Alborá, en Xixón, Asturies torna a contar con un espaciu onde atopar tola lliteratura fecha na nuesa llingua que pueda acoyer tamién presentaciones de les novedaes editoriales.

Nel llocal, amás del catálogu de Trabe, los veceros van atopar “llibros escritos n’asturianu, sobre Asturies y d’Asturies”, cola intención d’incorporar una seición d’arte y otra de feminismu. “Pretendemos dar un reblagu, una bona noticia, al mundu del asturianu y a Asturies”, esplica Prieto, ilusionada con un proyeutu que va abrir les sos puertes el vienres a les 20 hores con un actu inaugural.

Contador Estadistiques