“Col espectáculu n’Avilés y el llibru-discu queremos celebrar 30 años de conciertos pola oficialidá d’una manera diferente”, apunta la XDLA

Nun ye’l XXXI Conciertu pola Oficialidá, pero podría selo. La Xunta pola Defensa de la Llingua Asturiana (XDLA) apuesta esti 2019 por entamar un espectáculu’l 14 d’avientu nel avilesín Teatru Palacio Valdés como presentación d'un llibru-discu “colos que celebrar 30 años de conciertos pola oficialidá d’una manera diferente”.

‘La banda sonora de la oficialidá’ ye’l nome del trabayu que ta preparando la XDLA pa conmemorar les 30 reivindicaciones musicales en forma de conciertu cola partipación de decenes de grupos y artistes de manera desinterada dafechu pa reclamar los derechos llingüísticos de los asturianos en comuña col públicu asistente. Un camín qu’echó a andar n’Avilés, na Pista de la Esposición, un 29 d’abril del 1989, y que fai posa na mesma villa, nel Palacio Valdés.

Esti teatru centenariu va acoyer l’espectáculu de mesmu nome que sirva de presentación pal llibru-discu el 14 d’avientu. “Ye un formatu mui diferente a los de los conciertos pola oficialidá. Nun van ser siete hores de música continuada, sinón hora y media d’actuaciones a cargu de músicos que tienen collaborao nos conciertos pola oficialidá”, esplica Xosé Candel, de la XDLA, coleutivu que va dir avanzando los sos participantes en redes sociales nes selmanes próximes.

Van ponese a la venta 600 entraes non numberaes pa esta cita especial a un preciu de 5 euros que se van poder mercar en dellos puntos por anunciar en feches próximes o yá mesmo al traviés de la campaña de cuestación popular pa financiar ‘La banda sonora de la oficialidá’ al traviés de la plataforma Verkami. En poques hores el llibru-discu yá recaudó un cuartu de los 4.000 euros necesarios, en concreto 1.196 a la hora d’espublizar esta noticia.

Grabaciones en direuto de los 90

“El llibru ta conformáu por dellos ensayos históricos, amás d’otros distópicos”, rellata Candel, a lo qu'hai que sumar materiales inéditos, cartelos y semeyes de les trenta ediciones. Xunto a él, dos CD, “ún con grabaciones históriques de conciertos pola oficialidá, principalmente de los años 90”, y otru “con cantares de Músicos pola Oficialidá y otros non editaos que s’emplegaron en campañes o redes sociales”.

Va completar la xornada una espicha na Pescadería Municipal Antigua, “que realmente va ser una folixa con presencia de músicos y música pinchada”. El so preciu va ser de 25 euros y tamién se pueden mercar yá les entraes al traviés de diferentes recompenses del mecenalgu popular de ‘La banda sonora de la oficialidá’ per Verkami.

“Queremos celebrar estos 30 años de conciertu pola oficialidá d’una manera diferente. Facer una posa pa reflexonar, valorar y plantegar coses nueves pal futuru”, conclúi Candel.