Cofiño tresllada a la FACC que la Llei de Retu Demográficu nun supondrá obligaciones económiques nueves a los ayuntamientos

“Nun supondrá obligaciones económiques pa los ayuntamientos que nun vayan acompañaes de la correspondiente financiación”, aseguró’l vicepresidente Juan Cofiño sobre la futura Llei de Retu Demográficu. El conseyeru d’Alministración Autonómica presentó telemáticamente l’anteproyeutu a la Federación Asturiana de Conceyos (FACC).

Apuntó que la norma nun modifica’l réxime competencial de les entidaes llocales, esto ye, “que nun s’imponen a los conceyos obligaciones nueves, sinón que namái se pretende qu’incorporen a la so aición de gobiernu y a les sos polítiques públiques el puntu de vista demográficu”. “Sólo remando toos na mesma direición llograremos tornar la nuesa tendencia y tresformar la nuesa pirámide poblacional, que nestos momentos ye regresiva dafechu”, agregó'l tamién responsable de Mediu Ambiente y Cambiu Climáticu.

La propuesta llexislativa compónse de 81 artículos y organízase al traviés d’un títulu preliminar, seis títulos, una disposición adicional, una derogatoria y dos finales. Aprobóse güei nel aconceyamientu telemáticu de la Comisión d’Alministración Llocal y remitiráse a la Xunta Xeneral nes selmanes próximes.

La norma

El testu establez orientaciones sobre l’atención a la población, les sos necesidaes y aspiraciones, asina como sobre la prestación afayadiza de los servicios públicos, tanto nos distintos territorios como a les comunidaes y grupos d’edá. Igualmente, pretende impulsar les distintes funcionalidaes de los territorios rurales y urbanos, amás de la cohesión ente ellos, y crear oportunidaes nueves.

“Combina de forma equilibrada les medíes de coordinación de les polítiques públiques dirixíes al fomentu de l’actividá económica y la cohesión social, per un llau, y aquelles tendentes a fomentar l’aumentu de la población, per otru”, precisó Cofiño.

Na semeya, Cofiño preside la mesa con Jaime Izquierdo, comisionáu pal Retu Demográficu, a la so izquierda, y Vicente Hoyos, miembru del gabinete de Presidencia, nun momentu de la presentación por vía telemática a la FACC del anteproyeutu.