Cocineros vascos, cántabros y asturianos de renome presenten les sos recetes con gochu asturcelta

‘El gochu asturcelta, de la tradición rural a la cocina contemporánea’ ye’l nome del llibru qu’acaba d’asoleyar l’ACGA. Nella profesionales como Nacho Manzano o Arzak presenten les sos creaciones con esti animal autóctonu.
 
En total son 30 recetes d’otros tantos cocineros vascos, cántabros y asturianos de renome y inclúi tamién dalgunes propuestes tradicionales, como la fabada, el pote de castañes o la boroña. Según esplica Moisés Noval, secretariu de l’Asociación de Criadores de Gochu Asturcelta (ACGA), l’impulsor d’esta iniciativa foi’l presidente del coleutivu, José Manuel Iglesias, cola fin d’involucrar a cocineros de prestixu reconocíu na promoción d’esti productu asturianu, yá qu’hasta agora "los protagonistes foron los criadores".
 
Así, Iglesias consiguió axuntar a 30 firmes de la ‘nueva cocina contemporánea’, que fixeron les sos recetes pa esta espublización de forma espresa. Ente elles figura, por exemplu, 'Papada de gochu asturcelta, confitada a fuego bajo deuxelle, con setas y suero de pimientos asados en casa', obra del cocineru vascu Eneko Atxa. Les 'Ruedas de gochu asturcelta rellenas de bugre con su cuajo y crujiente de algas', ye dalgo que propón el xixonés Alejandro García Urrutia, mentes que’l donostiarra Juan María Arzak presenta ‘Lomo de gochu macerado’. El llibru tamién inclúi una reseña histórica de la evolución d’esta raza autóctona y una esplicación de les carauterístiques d’estos animales.