COAG píde-y al gobiernu qu'intervenga énte les baxaes de preciu del lleche

El sindicatu agrícola COAG-Asturies denunció ayeri nun comunicáu de prensa l'esmolecimientu qu'esiste nel sector llecheru al nun existir información sobre como van ser el próximu plan d'abandonu y repartu de cuota llechera. COAG denuncia que se tean dando noticies en dellos medios que falen de la creación d'un bancu de cuota llechera sobre'l que nun hai anuncies oficiales y alvierte que nun va consentir que se dean más perdes de cuota n'Asturies. Pal sindicatu agrícola ye'l momentu de facer un apueste decidíu pol sector del lleche n'Asturies, que ta al debalu de los intereses de la industria, denunciando la "baxada de precios unillateral de la industria que dexó estos meses a ganaderos que producen con altos estándares de calidá raspiando cola ruina".

COAG denuncia que n'otros países como Francia les alministraciones corten pela freba con estes práctiques de les industries resguardando a los productores de lleche d'estes baxaes de precios, polo que'l sindicatu camienta que ye'l momentu de que los nuestros gobernantes decidan si definitivamente cuenten con facer un apueste polos ganaderos de lleche asturianos que vienen yá dende va años faciendo un esfuerzu enorme por adaptase a los cambeos del negociu o si los abandonen.