CO OO Y UXT convoquen una fuelga indefinía nel sector del carbón

Los sindicatos CC OO y UXT, al ver “la postura cerrisca” del Gobiernu, decidieron convocar una fuelga indefinía nel sector del carbón dende’ l vienres. El tresporte per carretera asturianu entamará otra del mesmu calter el llunes.
 
La Federación d'Industria de CC OO recuerda que yá alvirtió ayeri, na xunta celebrada col secretariu d'Estáu d'Enerxía, Fernando Martín, que si'l Gobiernu nun presentaba una propuesta "seria" que desbloquiara'l conflictu, los sindicatos mineros aumentaríen el grau d'intensidá de les sos protestes. "Ante la postura cerrisca del ministeriu", CC OO y UXT decidieron "pasar de les palabres a los fechos y convocar fuelga xeneral indefinida na minería del carbón", indica’l sindicatu, que califica de "ésitu absolutu" el paru convocáu pa güei y que va continuar mañana.
 
CC OO afirma que Marín acudió a la xunta "ensin propuestes, polo qu'a los sindicatos nun-yos quedó otra qu'estender y aumentar la intensidá de les sos movilizaciones". Tamién insiste en que foi'l Gobiernu'l que, cola so "actitú irresponsable", favoreció la fuelga y denuncia la cortina de fumu que quiso estender sobre'l conflictu mineru convocando, una tres otra, xuntes vacíes de conteníu pa debilitar, ensin ésitu, una movilización que s'estiende como la pólvora poles "zones mineres".
 
Otra manera, estos dos sindicatos anunciaron güei otru paru indefiníu, esta vegada nel sector del tresporte per carretera n’Asturies, que va principiar el llunes. Asina lo decidieron depués de que dieren por rotes les negociaciones cola patronal na xunta que caltuvieron na sede del Serviciu Asturianu de Solución Estraxudicial de Conflictos (Sasec) pa ellaborar un conveniu nuevu. Según señalaron fontes sindicales, la postura de la patronal, formada por Car, Astra, Asvipymet, Cesintra y Asetra, foi "inflexible" y a pesar de que les organizaciones diben con una propuesta que rebaxaba'l so poder adquisitivu, los empresarios pretenden "quitar" derechos.
 
El sector del tresporte per carretera afecta a unos 8.000 trabayadores n'Asturies, tanto de mercancíes como de viaxeros. Los sindicatos tán seguros del ésitu de la convocatoria, incluyida la de mercancíes, dao que, aseguren, tán recibiendo llamaes de solidaridá de trabayadores d'otros territorios que yá-yos dixeron qu'a partir del llunes nun van circular per Asturies. Sicasí, afirmaron que siguen abiertos al diálogu pa evitar el paru, pero llamenten la postura "tan zarrada" de la patronal.