CO OO asegura que 30.950 paraos asturianos nun tienen cobertura económica

Miguel Iglesias Ballina, secretariu d’Emplegu de Comisiones Obreres (CC OO) d’Asturies, señaló esti llunes que 30.950 paraos asturianos nun tienen cobertura económica. Son cifres que nun se conocíen dende 2005, según el sindicatu.
 
La razón d’esta situación, esplica Iglesias, ye la desapaición del Programa Temporal de Proteición por Desemplegu y Inserción (PRODI) y el fechu de que los primeros afectaos pola crisis tean agotando los sos derechos. Según los datos del sindicatu, a finales de febreru’l 70,52 por cientu de los paraos con cotización previa contaben con cobertura económica de desemplegu. Asina, los paraos ensin cobertura lleguen yá la cifra de 30.950 nel país. CO OO tamién alertó de que la cifra d’hogares asturianos nos que toles personas en condiciones de trabayar alcuéntrense en paru llega a 29.096, el 10 por cientu, una proporción que duplicóse nos dos años últimos.
 
Iglesias destacó que l’informe últimu sobre prestaciones por desemplegu n’Asturies fechu pol sindicatu recueye que “el númberu de paraos aumentó en febreru en 2.064 persones, sicasí’l coleutivu de paraos cubiertos por prestaciones descendió en 932 persones nel mesmu mes”. El secretariu d’Emplegu de CO OO n’Asturies considera que la situación d’estes más de 30.000 persones afectaes va empeorar nes feches próximes nel casu de que nun se pongan en marcha midíes pa reforzar la proteición social.