Ciutadans gana les eleiciones catalanes, pero l'independentismu caltién la mayoría

Junts per Catalunya, ERC y CUP sumen 70 de los 135 escaños de la Generalitat.

La candidatura de Ciutadans-Partido de la Ciudadanía, liderada por Inés Arrimadas, foi la fuercia más votada nes eleiciones catalanes convocaes tres la disolución del Parlament pola aplicación del artículu 155 de la Constitución en Catalunya. Sicasí, esti trunfu nun va suponer qu'Arrimadas sía la próxima presidenta de la Generalitat, yá que los partíos independentistes siguen teniendo mayoría na Cámara.

Junts per Catalunya consiguió aguantar el tipu y suma, col 99,89 por cientu escrutao, un total de 34 escaños (21,65 por cientu del total de votos), por 32 d'ERC-Catalunya Sí (21,39 por cientu) y 4 de la CUP (4,45 por cientu), que pierde 6 diputaos. Mentes, Ciudadanos algama un 25,37 por cientu de los votos y 37 diputaos.

En total, l'independentismu pierde dos parllamentarios con respeuto a 2015, sumando un total del 47,49 por cientu del total de votos. El restu de fuercies con representación son el PSC, con 17 escaños (13,88 por cientu); Catalunya en Comú-Podem, con 8 (7,45 por cientu); y PP, con 3 (4,24 por cientu), 8 menos que nel 2015.