Ciudadanos usa’l plan pilotu “en bable” p’atacar la xestión del Programa Billingüe na Educación

Nicanor García Fernández, voceru de Ciudadanos, criticó la xestión de Genaro Alonso del Programa Billingüe aprovechando la cercanía del comienzu del cursu, pa lo qu’emplegó como arma’l plan pilotu pa facer l’asturianu vehicular en Primaria instituyíu'l cursu pasáu. El conseyeru afirma que ta cumpliendo’l programa de gobiernu.

En concreto, nuna intervención pa valorar la situación de la Educación nel país, el diputáu citó la situación del Programa Billingüe –castellanu y inglés–, que calificó de “deficiente”, acusando a Alonso de dar más importancia a “facer programes pilotos en bable o a otres cuestiones”, según informa Europa Press. Tamién criticó’l númberu altu d’interinos nel sistema educativu y afaló al conseyeru a dar respuesta a los problemes estructurales del mesmu.

El conseyeru, qu’esta mañana inauguró nel xixonés Teatru de la Llaboral la xornada ‘La convivencia escolar como factor d’ésitu nos centros educativos’, declaró esta mañana sobre l’asturianu, ensin facer referencia direuta a les pallabres de García Fernández, que “nosotros tenemos el nuesu programa de gobiernu que, tamos seguros y convencíos, llevaremos a bon términu hasta’l final de la llexislatura, colos nuesos compromisos, que tán escritos, y conforme al nuesu plan d’actuación”. Darréu defendió que “siguiremos faciendo el nuesu trabayu, como venimos faciendo razonablemente bien”.