Ciudadanos súmase a la campaña contra l’asturianu

El PP y VOX yá nun tán solos na so campaña agresiva contra l’asturianu. Ciudadanos, formación qu’hasta agora amosaba una oposición moderada a la oficialidá, ta emplegando esta cuestión como un elementu de confrontación nel tramu final de la campaña.

Dende l’alderique del llunes en TPA, Juan Vázquez vien insistiendo na so oposición frontal a la igualdá de derechos llingüísticos de los falantes d’asturianu colos de castellanu n’Asturies. Na entrevista a la qu’acudió ayeri a Canal 10 repitió que “nun voi pautar la cooficialidá del asturianu con naide”, marcando distancia cola FSA y afitando esti asuntu como una llinia collorada pal so partíu.

Sicasí, foi'l candidatu a l’alcaldía d’Uviéu, Nacho Cuesta, el qu'adoptó un discursu más radical cargando contra la “oficialidá amable” que defende la FSA por considerala una “imposición” del “bable” que “significará obligar a funcionarios, profesores y niños a deprendelu y usalu”. “Toos usamos pallabres n’asturianu na nuesa vida diaria, pero los uvieínos nun quieren la cooficialidá. Que nos diga Wenceslao López cuánta xente d’esta ciudá diz Uviéu en vez d’Oviedo o cai en llugar de calle, a pesar de los miles d’euros que se gastó’l tripartitu col PSOE a la cabeza en poner esa pallabra nos cartelos de les nueses ‘calles’”, afirmó.

Dende Ciudadanos d'Uviéu, nun comunicáu, entrúguense si los socialistes obligarán “a rotular establecimientos nes dos llingües, como pasa en Cataluña, coles multes correspondientes si s’incumple la llei que pretenden imponer agora”, emplegando una dialéutica asemeyada a la de VOX o'l PP a la que nun acostumaba la formación naranxa n'Asturies.

El programa

Ciudadanos fai referencia a la llingua asturiana en trés puntos del so programa eleutoral pa les eleicones a la Xunta Xeneral del domingu. El más significativu ye’l 136, na estaya dedicada a cultura, qu’entitula ‘Vamos a impulsar el conocimiento de la Cultura Tradicional Asturiana’.

Nel mesmu esplica que “incentivaremos la colaboración público-privada con otras instituciones como, por ejemplo, el Archivo de Indianos de Colombres o el Museo del Pueblo de Asturias. Defendemos la protección, promoción de uso y difusión de la Llingua asturiana en sus diferentes modalidades, tal y como se recoge en la necesaria y suficiente Ley 1/1998, de 23 de marzo, de uso y promoción del bable/asturiano. No apoyaremos la cooficialidad de la Llingua asturiana”.

Nel 5, na estaya ‘Defender una España de ciudadanos libres y iguales’, destaca que “vamos a garantizar que se pueda estudiar y trabajar en español en toda España. Exigiremos al Gobierno de España que garantice por ley que el conocimiento de una lengua cooficial autonómica nunca pueda ser una barrera para acceder a un empleo público en cualquier Administración Pública. Rechazamos el debate artificial y excluyente sobre la imposición del bable/asturiano como lengua cooficial en Asturias”.

Mentes, nel 98, dientro d’educación, cita que “vamos a defender el uso del español como lengua vehicular de la enseñanza, en Asturias y también en todo el territorio nacional. Garantizaremos la enseñanza de la Llingua asturiana como materia de libre elección en los centros educativos sostenidos con fondos públicos, en los términos en que quedó establecida en la necesaria y suficiente Ley de uso y promoción del bable/asturiano. Pondremos en marcha programas educativos que fomenten el conocimiento de nuestro entorno y que permitan un mayor conocimiento cultural y ambiental de Asturias”.

Na semeya, el candidatu Vázquez.