Ciudadanos nun ve bien que s'emplegue sólo l'asturianu en cartelos enfocaos al turismu

Por cuenta d'un panel cola programación de la XXVI Fiesta de la Sidra Natural de Xixón. Pide que, amás d'en llingua asturiana, tea en castellanu y inglés de cara al turismu.

En concreto, el grupu municipal de Ciudadanos refierse a un cartelu cola programación del festival asitiáu nuna de les casetes d'El Muelle onde s'emplega namái l'asturianu. Na so opinión, ésti debería incorporar tamién el castellanu y l'inglés pa facilitar la so comprensión a los munchos visitantes que recibe la ciudá esti mes d'agostu y demanda a la empresa municipal Divertia qu'emplegue al menos estos trés idiomes na promoción de toles so actividaes enfocaes al turismu.

La XXVI Fiesta de la Sidra Natural comenzó'l sábadu cola apertura del Mercadín de la Sidra y la Mazana y dellos conciertos dientro del ciclu 'Arte na cai'. La mayor actividá va tener llugar esta fin de selmana, col récor mundial d'escanciáu simultaneu'l vienres y la preba y entrega de premios na mañada del domingu, nun programa ampliu que pue consultar calcando nesti enllaz.