CiU llogra una amplia victoria y retrocede’l tripartitu

CiU llogró una amplia victoria nes elecciones catalanes con 62 diputaos, a seis de la mayoría absoluta, y dobló llargamente los escaños del PSC, que sufrió'l peor resultáu de la so historia, con 28 escaños.

Tolos integrantes del tripartitu sufrieron retrocesos y sumen 22 diputaos menos que nel 2006. ERC sufrió'l mayor palu al perder la metá de los sos diputaos y viose superáu por un PP que llogró'l meyor resultáu de la so historia, con 18 escaños.
  
La gran sorpresa protagonizóla la formación independentista del ex presidente del Barça Joan Laporta, qu'entró na cámara autonómica con cuatro diputaos, mientres qu'ICV baxó de doce a diez escaños y C's caltién los trés.
  
CiU, que barrió la fórmula del tripartitu que gobernó mientres dos lexislatures, ganó en caúna de les 41 comarques de Cataluña. Trátase de la mayor distancia ente ambes formaciones dende qu'en 1984 Pujol llograre la so primer mayoría absoluta.
  
El líder de CiU, Artur Mas, qu'acudía la tercer vez a la presidencia de la Generalitat, destacó que va actuar con "humildá" y apeló a una "gran movilización" ciudadana pa llevantar Cataluña.
  
Colos resultaos en mano, el primer secretariu del PSC y presidente de la Generalitat, José Montilla, diose priesa n'anunciar que va abandonar el lideralgu del partíu nel próximu congresu, previstu pal añu 2011, dempués de les elecciones municipales.
  
Con 18 diputaos, el PP rompió'l techu de 17 escaños llográu en 1995 por Aleix Vidal Quadras.
  
La candidata Alícia Sánchez-Camacho calificó de "históricu" el resultáu y consideró que "el cambiu n'España empieza en Cataluña".
  
Retrocesu d’ERC y ICV
Pero'l gran damnificáu d'estes elecciones ye ERC, que pierde la metá de la so representación, quedando en diez diputaos, en sufriendo un retrocesu de 210.000 votos, especialmente na provincia de Barcelona.
  
ICV-EUiA empató n'escaños con ERC, pero gracies a un mayor númberu de votos tornó na cuarta fuerza per delantre de los republicanos, nun Parlament nel que C's llogra caltener los sos trés diputaos, en creciendo nos cuatro provincies.
 
Los trés formaciones integrantes del tripartitu --CiU, ERC y ICV-- perdieron 21 escaños al respecto de los 70 que llograron hai cuatro años y que-yos permitió gobernar la segunda vez conxuntamente dempués del primer tripartitu de Pasqual Maragall.

División del independentismu
Superando les encuestes más optimistes, el partíu independentista de Laporta --Solidaritat per la Independència (SI)-- entró na cámara autonómica con cuatro diputaos. 
  
El Parlament de Cataluña queda agora mui fragmentáu, con siete partíos, frente a los seis que salieron de les urnes nel 2006, cola irrupción del partíu d'Albert Rivera (C's).

El votu independentista quedó dividíu. La cayida d'ERC viose compensada en parte pol crecimientu de la nueva formación de Laporta. Sicasí, quedó fuera de la cámara Reagrupament, escisión d'ERC.
   
La participación nes novenes elecciones de la Democracia en Cataluña bordió'l 60%, rompiendo los pronósticos qu'agoraben una escasa afluencia a les urnes.