CiU indica al PSC que “too” ye negociable menos la consulta

Francesc Homs, voceru en funciones del Executivu catalán, indicó a PSC y ERC que “too” ye negociable pa la formación de Gobiernu, a esceición de la consulta sobre la independencia. CiU ganó les eleiciones, pero nun tien mayoría.

"Tamos dispuestos a falar de too, pero hai que facer una consulta esta llexislatura. Ye'l mandatu más esplícitu qu'hai del resultáu d'estes eleiciones", afirmó na primer rueda prensa tres la xunta del Consell Executiu posterior a los comicios del domingu, que derivaron nun revés eleutoral pa CiU pese al trunfu –perdió 12 diputaos– y alzó a ERC a segunda fuecia del Parlament. Homs señaló que CiU ta dispuestu a negociar les demandes d'ERC en política fiscal, como la 'euroviñeta' –una figura impositiva que tendríen qu'abonar los camiones por circular en carreteres– y tamién recuperar l'Impuestu de Socesiones, pero namás pa los catalanes más ricos, promesa eleutoral d'Artur Mas nel 2010 y que'l so Executivu materializó.

Nel contestu actual, Homs retó a los otros partíos a tar al altor, dao que la posibilidá d'exercer el derechu a decidir ye una "oportunidá histórica" que nun se pue dexar escapar, afaló a superar ciertes rocees qu'hubo ente CiU y ERC, y recordó que'l PSC de primeres yera favoratible a celebrar una consulta."Ye tan grande lo que tenemos per delantre, ye tan mayúsculu, qu'esixe adoptar actitúes distintes a les teníes hasta agora", siguió Homs, qu'insistió en que'l mandatu de los catalanes ye inequívocu nesti sen. Por ello, apostó asina por conformar un Govern fuerte cola participación d'otres formaciones polítiques pa facer frente a la crisis, a "unos presupuestos duros" y al procesu de la consulta, pero evitó concretar si esto tien que traducise na entrada d'un partíu nel Govern o n'apoyos esplícitos dende fuera.