El barómetru del CIS sitúa a Podemos como primer fuercia n’intención direuta de votu

El PP ganaría les eleiciones xenerales con un 27,5 por cientu de los votos, por un 23,9 por cientu que recibiría’l PSOE y un 22,5 qu’algamaría Podemos, según datos del CIS. La formación liderada por Pablo Iglesias ye la primera n’intención direuta de votu, con un 17,6 por cientu por un 14,3 del PSOE.

Esta mañana’l Centru d’Investigación Sociolóxiques (CIS) dio a conocer los datos del Barómetru d’ochobre –fechu ente’l día 1 y el 13, enantes de la ‘Operación Púnica’–, onde destaquen los resultaos de Podemos n’intención direuta de votu. Los d’Iglesias sumen un 17,6 por cientu, superando asina a los dos partíos dominantes, el PSOE (14,3) y el PP (11,7), un fechu que se produz per primer vegada na historia reciente del Estáu. Sicasí, tres ‘cocinar’ los datos, el CIS da al PP como ganador nel casu d’haber unes eleiciones xenerales con un 27,5 por cientu d’estimación de votu, dexando a Podemos como tercer fuercia con un 22,5 por cientu. Mentes, el PSOE sumaría un 23,9 por cientu.

En comparanza colos datos últimos del CIS, del mes de xunu, el PP pierde dos puntos y medios n’estimación de votu al pasar del 30 por cientu al 27,5. Pela so parte, los socialistes viven una pequeña medra (del 21,2 al 23,9 por cientu), siendo la xuba más destacada la de Podemos (d’un 15,3 por cientu a un 22,5). El mayor perxudicáu del ascensu de Podemos ye Izquierda Unida, que cai d’un 8,2 por cientu a un 4,8. Otros partíos que medren son CiU (d’un 2,9 a un 3,8) y Ciudadanos (d’un 0,9 a un 2,1).