Cine apocalípticu

Les sales de cine asturianes nun dan abastu con tantes estrenes como les qu'hai esti fin de selmana, anque otro bien distinto ye la calidá de les películes. La versión remocicada del clásicu de 1979 "Apocalypse now" de Francis Ford Coppola lleva'l protagonismu absolutu, devolviendo a la gran pantalla y con cachos inéditos el viaxe interior y esterior de Martin Sheen pel ríu Nung p'arriba a la caza de Marlon Brando. Pero la cartelera enseña tamién otros productos que nun se ve mui bien per onde hai que garralos. Por nun salir de la tema bélico, esta selmana estrénase "Alas Rotas" una película española que calca tolos clichés de les pelicules americanes d'héroes de l'aviación tipu Top Gun pero treslladándolos a la patrulla Águila del exércitu español. Rodada con un presupuestu de tres millones d'euros y cola completa collaboración del ministeriu de defensa, "Alas Rotas" cuenta pa dellos papeles secundarios con militares de verdá...Pa enterate de los horarios en que ponen les películes, pues consultar la cartelera d'Asturies.com