Cincuenta families de Samartín del Rei Aurelio producen casi 3 tonelaes de ‘compost’ en nueve meses

Un total de cincuenta families de Samartín del Rei Aurelio, que participaron nun programa de reciclaxe de Coxersa, produxeron 2.950 quilos de ‘compost’ o abonu orgánicu pa usu domésticu. El programa tuvo una duración de nueve meses.
 
Esti proyeutu que tien como oxetivu la promoción del reciclaxe, en xeneral, y la producción de ‘compost’ pa usu domésticu, en particular, consisitió nel repartu de 50 máquines ‘compostadores’ a 50 families con una edá media comprendida ente los 50 y los 60 años. Per nueve meses, estes persones tuvieron reciclando residuos orgánicos pa la ellaboración d’esti abonu pa poder utilizalu depués nos sos güertos y xardinos. En total, les families xeneraron 2.950 quilos de ‘compost’ a partir de cerca de 11.100 quilos de restos d’alimentos, de siegues y maderes.
 
La campaña entamada pol Consorciu pa la Xestión de los Residuos Sólidos n’Asturies (Coxersa), y coordinada pola conceyalía de Promoción Económica de Samartín del Rei Aurelio, de la que depende’l departamentu de Mediu Ambiente, completóse con aiciones d’asesoramientu sobre la separación y el compostaxe de residuos orgánicos con caún de los participantes al traviés de cursos, visites, atención telefónica y corréu electrónicu a cargu del equipo d’Educación Ambiental de Coxersa. Dende l’ayuntamientu amosaron la so satisfaición polos resultaos algamaos nel programa desarrolláu nel conceyu.