Cinco xuristes trabayaron cola XDLA la propuesta d’artículu 4 que ta presentando a los partíos

Foro, Podemos y IX yá conocen la propuesta de la XDLA de redaición del artículu 4 del Estatutu d’Autonomía qu’inclúi la oficialidá, que va treslladar a Ciudadanos y la FSA nes dos selmanes vinientes. Cinco xuristes trabayaron col coleutivu’l testu del mesmu.

La Xunta pola Defensa de la Llingua Asturiana (XDLA), como confirmó’l so voceru nacional Carlos Pulgar na entrega de los XXXIII Premios Andrés Solar, sigue avanzando col ‘Proyectu 2018 pola Oficialidá’ “pa que tenga viabilidá na Xunta nel 2018, que ye’l plazu que nos marcamos porque hai oportunidá”, apunta Xosé Candel, que recuerda que’l siguiente periodu de sesiones ye práuticamente inhábil por mor de la cercanía de les eleiciones, “polo que nun ye un caprichu escoyer esta fecha”. Asina, nos meses últimos el coleutivu cívicu contautó con xuristes de trayeutoria reconocida pa redautar una propuesta d’artículu 4 del Estatutu d’Autonomía que presentar a los partíos.

Leopoldo Tolivar, Gonzalo Olmos, Nicolás Bartolomé, Yolanda Huergo y José Manuel Pérez son los profesionales que trabayaron sobre la idea previa de la XDLA, que llevó a una propuesta final qu’estos xuristes “califiquen ente impecable y mui bona”, afirma Candel. Ésta yá se llevó a Foro, Podemos y Izquierda Xunida (IX), mentes que la selmana qu’entra ta previstu l’alcuentru pa Ciudadanos y, na primer d’añu, cola FSA, mentes que’l Partido Popular (PP) sigue cola so postura de nun recibir a la organización.

La redaición concreta propuesta caltiénse en secretu “hasta que contautemos con tolos grupos políticos”, consciente de que “va sufrir modificaciones”, siempre cola incorporación de la pallabra ‘oficialidá’ o ‘oficial’ respeuto al asturianu al artículu 4 “como dalgo innegociable”. Anguaño ésti diz que “el bable gozará de proteición. Promoveráse’l so usu, la so difusión nos medios de comunicación y el so enseñu, respetando, en too casu, les variantes llocales y voluntariedá nel so aprendizaxe”, asina como que “una llei del Principáu regulará la proteición, usu y promoción del bable”.

“Más allá de la parte aritmética, queremos trabayar la parte social, efeutiva y emocional. Quita-y el mieu a los partíos qu’entovía nun tán convencíos”, añade’l  voceru de la XDLA. D’igual forma, el coleutivu tamién quier involucrar nel procesu a la sociedá civil, polo que ta preparando una movilización que signifique una amuesa importante d’apoyu a la oficialidá.