Cinco persones finen nun accidente de tráficu d'un autobús n'Avilés

Hasta'l llugar allegaron los efectivos de Bomberos del SEPA, de los parques d'Avilés y Pravia, amás del Grupu de Rescate, a bordu del helicópteru medicalizáu, y SAMU activó dos UVI-Móvil y ocho ambulancies de soporte vital básicu y convencionales d'Avilés y Xixón.

Cinco persones finaron (4 persones finaron nel llugar del accidente y una mientres la so evacuación al Hospital San Agustín) nun accidente de tráficu d'un autobús na AI-81, sentíu Uviéu, n'Avilés, al altor de les obres del nuevu accesu al polígonu de PEPA. Nel choque del autobús, por causes que nun se conocen, resultaron mancaes 16 persones.

Según los datos facilitaos pol Serviciu d'Atención Médica Urxente (SAMU) los afectaos fueron unviaos a dellos centros hospitalarios asturianos : Cinco persones tán pergraves. D'estos cinco, dos  fueron evacuaos al Hospital Universitariu Central d'Asturies (HUCA); una col Grupu de Rescate de Bomberos del SEPA, a bordu del helicópteru medicalizáu; otra en UVI-Móvil y los trés restantes fueron treslladaos en UVI-Móvil, una ambulancia de soporte vital básicu y otra n'una ambulancia convencional con un equipu médicu d'Atención Primaria, al Hospital San Agustín. Una persona grave foi treslladada al Hospital de Cabueñes. Diez persones, mancaes de calter leve, fueron unviaes al Hospital San Agustín.

El Centru de Coordinación d'Emerxencies recibió l'avisu a les 13:39 hores. Na llamada indicóse qu'había un autocar accidentáu na zona d'obres, de la que se sale d'Avilés, contra una pilastra. De momentu movilizóse al Xefe d'Área, al Xefe Supervisor y al Xefe de la Zona Centru Oeste de Bomberos del SEPA, 8 efectivos de bomberos de los parques d'Avilés y Pravia, amás del Grupu de Rescate de Bomberos, a bordu del helicópteru medicalizáu.

La sala del 112 del SEPA informó del sucesu a la Policía Local, a la Policía Nacional y al SAMU qu'activó dos UVI-Móvil d'Avilés y Xixón, dos ambulancies de soporte vital básicu d'Avilés y un equipu d'atención primaria, dos ambulancies convencionales d'Avilés, cuatro ambulancies de Transinsa y un Hospital de Campaña del SAMU. Tamién s'activaron dos equipos d'ayuda Psicosocial de Cruz Bermeya, unu ta nel Hospital San Agustín y otru nel Institutu de Medicina Llegal.

Semeya y fonte: SEPA Asturies