Cinco formaciones aspiren a llevar el Premiu al Meyor Cantar del 2012 na gala del Teatru de la Llaboral

El Teatru de la Llaboral acueye esti vienres la gala del VII Premiu al Meyor Cantar, que va poder vese de madrugada pela TPA. ACD, Aire, Fala non Caduca, La Tarrancha y Taranus son les formaciones qu’aspiren al gallardón que da plaza pal Liet.

La edición d’esti añu axunta cinco finalistes más averaos al rock, cola esceición d’Aire, formación compuesta por trés voces grandes de la escena asturiana como Anabel Santiago, Mapi Quintana y Marta Arbás acompañaes del acordión de Xuan Nel Espósito y delles collaboraciones, como la del pianista Jacobo de Miguel. El cantar que van defender ye ‘Enzo’, tangu con lletra de Ruma Barbero interpretáu por Quintana y dedicáu a Enzo Ferrero, consideráu’l meyor xugador estranxeru de la historia del Sporting y integrante del ‘once’ del centenariu de Boca Juniors.

Adolfo Camilo Díaz, esto ye, ACD, va defender el tema ‘La güela’, un cantar sele, mientras que la banda de folk-metal Taranus presenta una balada con lletra de Diego Díaz Martino, nesti casu a trés voces, entitulada ‘Ensin ti’. Tamién van aspirar a llevar el Premiu al Meyor Cantar dos veteranos del concursu como La Tarrancha y Fala non Caduca. Los primeros, finalistes nel 2007 col cantar ‘Exit-encia’, participa con ‘Qué faer!’ (lletra de Delfín Valdés), mentes que los ḷḷenizos, que compitieron nel 2011 con ‘Sele Sound System’, nesta ocasión va facelo con ‘Escoyer el camín’ (lletra d’Adrián González Pérez’).

Na gala tamién va actuar l’Asturiana Mining Company, ganadores del añu pasáu con ‘Si nun conoces Vaḷḷouta’, mientres el xuráu toma una decisión sobre la banda que firme’l meyor tema del 2012 y que tenga’l derechu de defender a Asturies nel Liet International, festival européu de canción en llingües minoritaries qu’esti añu va celebrase en Còrsica. La entrada al Teatru de la Llaboral pa la final, que va principiar a les 20.30 hores, ye de baldre. Tamién va poder vese pela TPA, anque non en direuto, como s’anunciara nun primer momentu. La cadena pública de televisión va emitir la gala presentada por Sonia Fidalgo y Naciu Varillas a medianueche.

Na semeya, un momentu de l'actuación de l'Asturiana Mining Company na edición pasada.