Cinco conceyos asturianos participen na campaña ‘La hora del planeta’

Avilés, Llangréu, Samartín del Rei Aurelio, Uviéu y Xixón van apagar les lluces de los sos edificios más carauterísticos ente les 20.30 y les 21.30 hores del sábadu. Estos conceyos participen en ‘La hora del planeta’, campaña de WWF.

Dende hai siete años, esta ONG fai una llamamientu a instituciones públiques, empreses, coleutivos y particulares p’apagar les lluces per una hora en defensa del mediu ambiente. Añu tres añu, son más les ciudaes y persones que s’animen a participar nesta campaña que busca concienciar a la población de que “los xestos simbólicos pueden xenerar cambios grandes si conseguimos un compromisu global per tol añu”. Asina, nesta edición de ‘La hora de planeta’, World Wildlife Fund (WWF) consiguió incorporar al so proyeutu a 7.000 ciudaes de 152 estaos, ente los que destaquen cinco conceyos asturianos que se sumen al compromisu de “crear una comunidá global interconectada que demuestre hasta ónde podemos llegar pa camudar el mundu en que vivimos. Queremos que toos, individuos, empreses, ayuntamientos y centros educativos, apuesten por ser más eficientes y autosuficientes nel usu de la enerxía y que promuevan les enerxíes llimpies p’algamar, d’esta mena, reducir el nivel d’emisiones de C02 del planeta”.

D’esta forma, mañana, de 20.30 a 21.30 hores, Avilés va apagar la fachada de la Casa Conceyu; Llangréu, la fachada de la ilesia de Sama y la ponte, la plaza de la Casa Conceyu, el MUSI, chimenes refractaes, la Torre Quintana y la fachada de la ilesia de Ciañu; Samartín del Rei Aurelio, el castillete y la Casa la Cultura de L’Entregu, la plaza Ramón y Cajal de Sotrondio, y la plaza de la ilesia de la Nuesa Señora del Rosariu, en Blimea; n’Uviéu, la Casa Conceyu, la catedral, la ilesia de San Xuan el Real, el Teatru Campoamor y el monumentu al Sagráu Corazón de Xesús nel Naranco; y en Xixón, la Plaza Mayor, la Plaza’l Marqués, los Xardinos d’El Naútico, el paséu d’El Muro, les aveníes de la Pecuaria y d’Albert Einstein, la Pescadería Municipal, l’Antiguu Institutu Xovellanos, la ilesia de San Pedro, la ilesia de San Xosé, la ilesia de San Llorienzu, la Ilesiona, la ilesia de San Xulián de los Praos, en Somio, y la ilesia de San Salvador, en Deva.