Cinco arxelinos deteníos en Navarra y Euskadi acusaos de financiar a Al Qaeda nel Magreb Islámicu

La Guardia Civil detuvo na madrugada del martes a cinco arxelinos acusaos de financiar a Al Qaeda nel Magreb Islámicu, seición del grupu terrorista islamista nel norte d’África. Estes persones tienen edaes comprendíes ente los 36 y 49 años.
 
La operación policial coordinóla'l xuez Central d'Instrucción de l'Audiencia Nacional, Fernando Grande Marlaska, que va tomar declaración a los deteníos nos próximos díes. Según detalló’l Ministerio del Interior, los acusaos son Mohamed Talbi, Hakim Anniche, Mounir Aoudache, Abdelghaffour Bensaoula y Ahmed Benchohra, persones que se cree podríen tener vínculos con otros grupos similares asentaos en países europeos.
 
Los cinco arxelinos foron deteníos nes poblaciones d’Iruña y Berriozar (Navarra) y n’Irún y Legorreta (Gipuzkoa). La operación tuvo un despliegue de más de 150 efeutivos y la investigación continúa abierta, polo que nun se descarten detenciones nueves. Los terroristes d’Al Qaeda nel Magreb Islámicu fixeron numberoses aiciones nel norte d’África nos últimos años, ente ellos, el secuestru l’añu pasáu, per dellos meses, de trés cooperantes catalanes.