Cierren files en Degaña

Yá va pa tres años que la empresa Coto cortés recreció la esplotación d'hulla a cielu abierto que tien en Zarréu, conceyu de Degaña. L'ampliación diola de pasu en payares del 99 el Gobiernu asturianu, bendiciendo col so polémicu placet l'enanchamientu en delles hectaries d'una mina que ta en medio d'un llugar oseru y cantaderu de gallos monteses, na llende de la Reserva de Somiedu, reconocía va poco pola UNESCO como patrimoniu de la biosfera. Los reconocimientos d'esti espaciu como daqué escepcional nun valieron pa que'l Principáu s'echare atrás en conceder l'ampliación. Foi entós cuando'l guarda rural José Manuel Lago denunció al Principáu énte la UE polo que-y paecía un atentáu al espaciu protexíu. Poco dempués de poner la denuncia, a Lago abriéron-y espediente por desobedecer a un superior, un fechu que a Lago abulta-y una represalia descomanada pero que nun valió pa que la UE dexare d'investigar a Asturies.Ayeri, los sindicatos mineros SOMA y CCOO, anunciaron xunto col Principáu y la mesma empresa Coto Cortés que l'ampliación ye "esencial" pal desarrollu dela comarca y que s'axusta al marcu llegal. La declaración conxunta faenla agora col enfotu de para lo que puedan la investigación de la UE y dar una imaxe de normalidá. Da la casualidá que'l guarda Jose Manuel Lago pertenez a CCOO, que ye ún de los sindicatos que tan agora al favor de l'ampliación.