Cientos de fogueres van quemar n’Asturies na nueche de San Xuan

Na medianueche d’esti xueves cientos de fogueres van quemar n’Asturies pa celebrar San Xuan. La nueche más máxica del añu va trayer un abanicu grande d’opciones pa disfutar d’una de les cites más esperaes del añu.
 
La mayoría de ciudaes y pueblos del país –y munchos barrios– tienen preparaes pa esta nueche fogueres pa celebrar el solsticiu de branu y quemar los augurios malos. Una tradición de raigaños celtes que entovía ta mui viva n’Asturies y que ye un cultu al sol y a l’agua al traviés del engalanamientu de fontes.
 
Asina, ente los clásicos d’esta celebración destaca la foguera de Corvera, que tien llugar en Trasona. Como ye vezu nesta folixa, Dixebra va tar enriba del escenariu (00.30 hores), nesta ocasión xunto a Anabel Santiago y Héctor Braga (23 hores), y Falanoncaduca (1.30 hores). Tamién van actuar la Banda Gaites de Corvera, alredor de les diez de la nueche, y el grupu de teatru Nun Tris, que va facer una representación enantes del prendíu de la foguera.
 
Blima va ser el grupu que va llevar la so música nesta nueche a les miles de persones que s’averen a la playa xixonesa d’El Natahoyo pa baillar la danza prima y ver como quema la foguera enorme qu’instala’l Conceyu na sablera. Enantes, a primer hora del anochecer, la Banda Gaites Noega y la Banda Gaites Villa de Xixón van facer un pasucais per separtao con final na playa.
 
En Llugones, otres de les folixes clásiques, va actuar Verdasca alredor de les 23 hores pa, tres el parón pal prendíu de la foguera, dar relevu a la Bandina La Curuxa. Mentes, en Grau, la nueche San Xuan va tar amenizada pola música de Lafu y Rebeca, la Banda Música Los Estudiantes, Alienda y el Grupu de Gaites Escuela de Música de Grau. N’Uviéu, la plaza la Catedral ye’l llugar onde va tener llugar la celebración, que va principiar a les 20 hores con un pasucais de les bandes de gaites Ciudad de Oviedo y Vetusta, y los grupos folclóricos Xuno y Ciudad de Oviedo, pa depués dar pasu, a les 23.30 hores, al espectáculu teatral ‘Extraños en la noche de San Juan’, de Teatro Margen. A medianueche va prendese la foguera y va baillase la danza prima.
 
El Centru Social La Semiente, de creación nueva, va recuperar esta celebración en L’Entregu, na que va haber sitiu pa la música, les dances, los malabares y el teatru. Ésta yá ta preparada pegada al campu fútbol, onde l’actividá va principiar a les 22.30 hores. Los miembros de La Semiente conviden a tolos vecinos a participar nesta foguera que pretenden consolidar col pasu los años.
 
Pese a que mañana ye día llaborable, esta nueche nun hai escusa pa visitar dalgunes d’estes fogueres o cualquiera que s’entama nos pueblos y barrios d’Asturies. Nunca se sabe que pue pasar en San Xuan.