Cienfuegos fai referencia a los ésitos del FICXixón pa defender la so xestión tres el so cese como direutor

José Luis Cienfuegos, al traviés d’un comunicáu, defendió la so xestión al frente del Festival Internacional de Cine de Xixón (FICXixón). Fixo referencia a la xuba espectacular de públicu y al reconocimientu del certame fuera de les nueses llendes.

L’hasta ayeri direutor del FICXixón resaltó que cuando se fixo cargu del festival, nel 1995, el númberu d'espectadores malpenes superaba los 10.000, cifra que medró hasta los 75.000 nes ediciones últimes. D’igual forma, faló reconocimientu internacional del certame, qu’atribuyó al trabayu intensu de les persones que collaboraron con él mientres esti periodu, y insistió na apuesta arriesgada por un estilu "inéditu" nel Estáu, nel que se punxo l'acentu nos últimos enclinos de cada momentu, intentando nun retrucar clónicamente añu tres d'añu "hasta quedar mayaos".

Reconoció, sicasí, que pudieron fallar "n'ocasiones", anque destacó que la mayoría de les veces acertaron casi "estrepitosamente". "Intentamos con escrúpulu actuar llibres de prexuicios y siempre indiferentes a los ídolos de la tribu", repostió. Cienfuegos resaltó tamién l'apuesta polos críticos nuevos cinematográficos, nos que víen talentu y futuru y que, de siguío, munchos alquirieron una renome. Algo que dixo "supon-y un arguyu especial".

Coles mesmes, afirmó que contribuyeron al espardimientu de la cultura cinematográfica na sociedá y citó dellos exemplos como ‘Nuevos Cines’, ‘Universu Media’ o la seición ‘Enfants Terribles’. Aprovechó, tamién, pa agradecer el llabor del so equipu, al que calificó que "cohesionáu, solidariu y xenerosu nel trabayu", col que construyó un festival ambiciosu dende'l puntu de vista artísticu, pero alloñáu d'impostures y solemnidaes, siempre cercanu y abiertu", asina como "accesible , participativu, esixente y rigorosu". Nel comunicáu tampoco nun s'olvidó del públicu que cada añu s'avera al certame.

El Xovellanos pide un marxe de confianza pa Nacho Carballo

La xerente del Teatru Xovellanos, María Teresa Sánchez, recordó güei que los cargos de confianza y de direición "nun son vitalicios" y pidió un marxe de confianza pal sustitutu de Cienfuegos, Nachu Carballo. Asina lo manifestó al respeuto de la manifestación d'apoyu al ex direutor del FICXixón que se celebró esta nueche na Plaza Mayor.

Dexó claro, eso sí, que "naide vien a romper col Festival de Cine de Xixón, y dígolo con mayúscules, pues el festival ye de Xixón, y non de José Luis Cienfuegos". Ye más, apuntó que tanto'l Conceyu como la Conceyalía de Cultura y el Teatru Xovellanos quieren realzar más el certame, "que como bien diz la so denominación, ye internacional", dixo remarcando la última palabra en mayúscules. Sánchez esplicó que van caltenese les mesmes estayes y va ampliase con delles más, amás de que va dase más importancia al cine asturianu, pero a tolos sectores y ámbitos de trabayu rellacionaos col cine: direición, realización, escenografía, fotografía o producción, por exemplu. Too ello al oxetu "de fortalecer un sector empresarial asturianu que taba marchando fuera por nun haber trabayu na so tierra", repostió.