Cien mil árboles pal osu en Miranda

El Fondu pa la Protección de los Animales Selvaxes (FAPAS) y una empresa eólica que va poner un parque de xeneradores de corriente en conceyu de Miranda, van llevar alantre un plan pol que van plantase cien mil árboles en conceyu col envís de que los sos frutos-yos valgan d' alimentu a los osos. Trenta mil castañales y trentaycinco mil crezales igüen los dos grupos más importantes d'esta iniciativa que va emplegar tamién ablanos, pomaraes y andrinos. El plan pa Balmonte enxértase dientro d'un proyectu más xenéricu, que baxo'l nome "frutos pal osu" yá ta llevando alantre'l FAPAS n'otros conceyos y va contar tamién cola collaboración de propietarios particulares de finques p'asitiar árboles nelles. Ello ye que si'l terrén s'estima que val pa los oxetivos del plan, los dueños de les finques pasen a ser dueños de los árboles que se pongan nelles, pudiendo'l día de mañana aprovechar la madera de gran calidá de la castañal y la crezal.