Ciberactivistes internacionales convoquen un ataque a la SGAE

El grupu ciberactivista internacional 'Anonymous' convocó un ataque contra la SGAE pa les 00.00 hores de la madrugada del xueves, coles mires de dexar sin serviciu la web de la entidá española de xestión de derechos d'autor.

Según revela'l llaboratoriu Panda, l'ataque de denegación de servicios distribuyíos (DdoS) enmárcase nuna iniciativa llamada 'Operation Payback', entamada por usuarios del portal americanu 4Chan.
  
Un ataque DdoS consiste en llanzar numberosos pidimientos a un servidor qu'agospia una páxina web, de manera que'l serviciu de hosting nun pue soportar la carga de pidimientos y queda suspendíu'l serviciu. D'esta manera, cualquier qu'intentare acceder a la web de SGAE, podría nun ser a algamar el dominiu. 
  
"Punximos en contactu con SGAE p'avisalos d'esta convocatoria y esta nueche vamos tar siguiendo en tiempu real los acontecimientos. Viendo la progresión d'oxetivos, resultaría estrañu que vayan país a país convocando ciber-protestes contra los distintos organismos protectores de los derechos d'autor", esplicó Luis Corrons, director técnicu de PandaLabs

Respuesta al zarru de webs
Esti ciberataque conxuntu lleva delles selmanes en marcha con distintos oxetivos, en respuesta al intentu de zarru de webs d'intercambiu de ficheros.
  
El pasáu 17 de setiembre, llanzaron un ataque contra l'Asociación Americana de la Industria Musical (RIAA) y l'Asociación Americana Cinematográfica (MPAA), que resultó en 37 cayíes del servidor y casi dos hores d'inactividá de la web.