Ciañu vive esta fin de selmana la IV Romería de Primavera

El parque de Ciañu va ser sede esti domingu de la IV Romería de Primavera, eventu yá consolidáu na población llangreana. Al igual que n’años anteriores, el certame ‘Cantando pelos Chigres’ va ser ún de los actos principales de la folixa.

La IV Romería de Primavera trátase d’una fiesta entamada pol Conceyu de Llangréu, en collaboración cola Asociación de Vecinos S. Antonio de Ciañu y les agrupaciones corales José León Delestal, Santa Apolonia, Polifónica Entreguina y S. Andrés Sergio Domingo, que pretende llevar la folixa y la cultura tradicional a tol distritu llangreanu de Ciañu. Les actividaes van principiar de sábadu, a les 19 hores, con un conciertu d’Inntermezzo y d’Esguín nel quioscu del parque Rosario Felgueroso. Mentes, a les 20.30 hores va principiar la cuarta edición del certame ‘Cantando pelos Chigres’ cola entrega de llibros coles canciones a los participantes y el comienzu de les rondes pelos chigres de Ciañu colos coros y les pareyes de gaita y tambor.

Yá de domingu, a les 11 hores, va haber una diana floriada con gaita y tambor, un desfile de Xigantes y Cabezudos, y disparos de morteros, actividaes a la que va siguir, a les 12.30 hores, un conciertu de la Banda Música de Llangréu. Darréu, a les 13.30 hores, va tener llugar la segunda parte del certame ‘Cantando pelos chigres’. Los xuegos tradicionales van protagonizar, a partir de les 17 hores, les actividaes vespertines xunto coles atracciones pa neños y neñes, y les actuaciones de bandines y de pareyes de gaita y tambor.

Pa les 18 hores ta previsto l’entamu de la romería, que va tar amenizada por coros, canción asturiana y la Bandina Tradicional Valle del Nalón –tamién va haber escenariu llibre pa tol que quiera xubir– y regada pola sidra d’una pipa. Ésta va ser l’actividá última de dos díes de folixa que se completen cola esposición ‘Resistencia minera 2012’, d’Alberto Fernández Zapico, nel Centru de Referencia de la Cultura y la Llingua Asturiana Casa de los Alberti. La muestra va tar abierta al públicu hasta’l 28 de xunu.