Ciañu celebra’l domingu la Romería de Primavera y el certame ‘Cantando pelos chigres’

Tres l’ésitu de l’añu pasáu, Ciañu va acoyer la segunda Romería de Primavera, que va contar con una montonera d’actividaes. Ésta va celebrase esti domingu y va incluyir el certame ‘Cantando pelos chigres’.
 
La Romeria de Primavera de Ciañu ye una iniciativa del Conceyu de Llangréu, xunto cola Asociación de Vecinos S. Antonio de Ciañu y la Escuela de Música Tradicional del AMPA del Conservatoriu Valle del Nalón, que cuenta con una montonera d’actividaes a lo llargo del tol día. A les 11 hores va celebrase la primer d’elles, que va consistir nuna diana floriada de gaita y tambor, un desfile de xigantes y cabezudos, y disparu de morteros. Al meudía ta prevista una misa amenizada con música tradicional y, a les 12.30 hores nel parque Rosario Felgueroso, un taller de baille a lo suelto y xuegos tradicionales pa neños y neñes.
 
De siguío, va entamar la ‘sesión vermú’ coles actuaciones de los alumnos y alumnes de la Escuela de Música Tradicional Llangréu, amás de Carlos Ronderos, Justino González, Xuan Nel Expósito y l’agrupación coral José León Delestal ‘El Carmen’, pa depués dar pasu al II ‘Cantando pelos chigres’, que consiste nuna ronda pelos chigres del pueblu pa canciar los cantares de tola vida. Yá de tarde, a les 18 hores, va principiar la romeria en sí, con sidra de pipa y un escenariu pel que van pasar otra vuelta los alumnos y alumnes de la Escuela de Música Tradicional Llangréu, anque nesta ocasión acompañaos polos profesores Anabel Santiago, Chema Fombona, Chus Solís, Héctor Braga, Pelayo Fernandez, Pepín de Muñalén y Xose Ramon Navia. Tamién van repetir Carlos Ronderos, Justino González, Xuan Nel Expósito y l’agrupación coral José León Delestal ‘El Carmen’.