Ciañu acueye una esposición de semeyes de Rodríguez Linera sobre la vida nel este d’Europa

La Casa los Alberti, en Ciañu, ye la sede de la esposición ‘Una mirada al este’. Nella, el fotógrafu llangreanu Javier Rodríguez Linera presenta una serie de semeyes feches dende’l 1998 n’Ucrania y Rumanía.
 
Na seronda d’esi añu, Rodríguez Linera visitó la población de Lviv, nel occidente de la república ex soviética d’Ucrania. D’esi viaxe surdió un interés pergrande del artista pola parte del continente asitiada al otru lláu del telón d’aceru, una atraición de la que ye resultáu ‘Una mirada al este’. Esta esposición “quier amosar la vida n'Ucrania y en Rumanía al traviés d'una mirada interesada y empática qu'afaya la vitalidá de les sos xentes nel día a día. Estes semeyes quieren ser un ventanucu abiertu pel qu'entrever a esa familia de llabradores nos montes de los Cárpatos, a esi arguyosu home qu'enseña'l mapa de lo que foi la gran Rumanía, a eses paisanes que ven pasar el mundu frente al so bancu… Xente que trabaya, que va al mercáu, que charra colos collacios, que fuelga nun parque. Xente normal a lo que-y debo abondo”, señala l’artista.
 
Esta muestra de fotografíes va poder visitase na Casa los Alberti hasta’l xueves 28 d’ochobre n’horariu de 9 a 14 hores, según informa’l Conceyu de Llangréu.