Ciañu acueye la esposición ‘100 años d’anarcosindicalismu n’Asturies’

Dende esti vienres y hasta’l 3 de marzu, la Casa de los Alberti acueye la esposición ‘100 años d’anarcosindicalismu n’Asturies’. La muestra fai un percorríu pela historia d’esti movimientu dende los sos empiezos nel 1910 hasta agora.
 
La muestra, bien documentada, “busca poner en valor la importancia d’esti movimientu, tolo que significó pa la llucha obrera y tamién la so faceta educadora”, espliquen dende’l Centru de Referencia de la Cultura y la Llingua Asturiana Casa de los Alberti. Asina, al traviés d’una seleición de prensa, llibros, cartelos y documentos d’archivu, “recuerda a los sos protagonistes, evoca la obra anarcosindicalista y recupera la so memoria. ‘100 años d’anarcosindicalismu n’Asturies’ nos permite conocer el llabor de los personaxes más importantes del movimientu, tales como Avelino González Mallada, Eleuterio Quintanilla o Ramón Álvarez, ente otros”.
 
L’Atenéu Llibertariu de Xixón ye l’impulsor d’esta esposición, na que tamién collaboren el sindicatu CGT y el Conceyu de Llangréu.