Chus Pedro asoleya’l so segundu discu en solitariu, 'Nenita’

El cantante entreguín Chus Pedro presentó n’Uviéu’l so segundu discu, el primeru tres la despidida con Nuberu. ‘Nenita’ ye’l nome d’esti trabayu d’estudiu compuestu por once cantares, nueve tradicionales y dos propios.
 
Trátase d’un álbum íntimu y personal nel que Chus Pedro dedica delles pieces a dalgunos de los sos seres queridos al traviés de cantares con temes y estilos musicales diversos. La Mula Torda, discográfica de la que ye responsable’l propiu cantante de L’Entregu, asoleya esti discu que presentóse esta mañana na sede de la Sociedá Xeneral d’Autores y Editores (SGAE) n’Uviéu cola presencia de Chus Pedro, el teclista y direutor musical del trabayu, Gabino Antuña, y el téunicu de soníu, Juanjo González. Nel actu, el cantante esplicó qu’esti trabayu xeneró-y un “esgarru terrible no personal”, por tar dedicáu a la so hermana ‘Nenita’. Sicasí, señaló que l'álbum convida a “llorar, cantar, baillar…”, pero, “sobremanera a rir”.
 
Los dos cantares propios que presenta l’ex vocalista de Nuberu, musicaos por Antuña, son ‘Bárbara’, dedicáu a la fía del vocalista, y ‘Nenita’, únicu tema en castellán del discu, dedicáu a la so hermana. El resto de temes d’esti trabayu son tradicionales pasaos pol filtru de Chus Pedro. Asina, atopamos ‘Carretera abaxu va’, ‘Dime ónde vas morena’ o 'Baxaben cuatro ayeranos'. Un toque novedosu en ‘Nenita’ ye la incorporación d’una versión flamenca de ‘Si quies que te cortexe’, que tien la collaboración de José Manzano Cortés y Juan Gabarry 'El Brujo'. Chus Pedro esplicó que tenía ganes de fundir el flamencu col soníu tradicional asturianu, y qu'anque la esperiencia foi "difícil, porque nun tenía nada que ver", el resultáu foi “bien guapu”.
 
Tamién collaboraron nel discu Fran Suárez (flauta trevesera), María Álvarez (acordión), Sául Quiñones (gaita sib), Raquel Castro (violín), Carlos A. García (guitarra acústica), Julio Gilsanz (guitarra acústica), Luis Rodríguez ‘Luiggy’ (baxu), Elías García (bouzouki), Diego Pangua (flautes y gaita), Nori Vigil, Tania García, Ángeles Nespral y Noelia Prieto (voces y panderetes), y el gaiteru José Ángel Hevia. El maliayu intervién en trés de los cantares del álbum.
 
Esti sábadu, a les 20 hores, van poder sentise per primer vegada los temes de ‘Nenita’ en direutu. Va ser nel Teatru de la Llaboral dientro de la Gran Nueche Celta na que tamién participen los irlandenses Altan y los escoceses Capercaillie. Pa esta cita y les próximes, Chus Pedro y Antuña axunten la mesma banda que na xira del primer discu ‘De ñublu y orpín’ (2003): Julio Sánchez-Andrade (batería), Saúl Quiñones (gaita), Eva Díaz (percusiones), Nachu Alonso (Chelo), Raquel Castro (baxu), Tom Prendes (guitarra y bouzouki) y Pedro Pangua (gaita y flautes).