Chus Pedro, Altan y Capercaillie van protagonizar una nueche celta nel Teatru de la Llaboral

Esti sábadu va celebrase nel Teatru de la Llaboral de Xixón un espectáculu que lleva pol nome ‘Gran Nueche Celta’. Chus Pedro, los irlandeses Altan y los escoceses Capercaillie formen el cartel d’esti eventu.
 
Esti conciertu trátase d’una cita especial pa los aficionaos a la música tradicional de raigaños celtes pola presencia de dos grupos que son referencia nos sos países respeutivos xunto con Chus Pedro, cantante de Nuberu que tres despedise de los siguidores nuna xira per toda Asturies torna a los escenarios en solitariu. Pa ello presenta’l públicu de la Llaboral un discu nuevu, el segundu ensin Manolo Peñayos, que lleva’l nome de ‘Nenita’.
 
Tres el cantante de L’Entregu van xubir a les tables del teatru xixonés Altan, qu’esti añu cumplen el so 25 aniversariu. Pa ello, el quintentu irlandés tá acabante de sacar un recopilatoriu colos sos temes más conocíos d’una llarga trayeutoria musical que-y permitió llevar la música tradicional d’Eire pel tol mundu. Por último, y pa zarrar esta nueche tán esperada, va actuar Capercaillie, otra banda bien conocida dientro y fuera de les llendes del so país, Alba. Dende la organización de la Llaboral anuncien que los escoceses, con bones rellaiciones con músicos asturianos tres les visites que fixeron a Asturies dende los sos primeros pasos como banda, podríen sorprender al públicu con dalguna collaboración.
 
El preciu pa presenciar esti espectáculu, que va dar aniciu a les 20 hores, ye de 25 euros nel anfiteatru y de 30 nel patiu de butaques y resto de zones del teatru. Los interesaos en presenciar la ‘Gran Nueche Celta’ de la Llaboral pueden mercar les sos entraes nel Centru de Recepción de Visitantes y Tienda de la Llaboral, nel Puntu d’Información de Campu Valdés –namái pagos en metálico–, na rede de Caxeros Caxastur y en TiquExpress per Internet.