Chat con Darío Villanueva

A les cinco d'esta tarde, el periódicu
La Voz de Galicia ufierta pela so
canal de chat una
prestosa ocasión pa falar con Darío Villanueva, rector de la
Universidá de Santiago de Compostela y conocíu pal públicu
asturianu por ser, dientro de la subcomisión d'humanidaes del Conseyu
d'Universidaes, quien más echó pa contra la creación de
la Llicenciatura en Filoloxía Asturiana, una llicenciatura que
pidía la Universidá d'Uviéu y que contaba col sofitu de la
Xunta Xeneral del Principáu.

Darío Villanueva consiguió que'l Conseyu d'Universidaes
refugare otra vuelta la creación d'una llicenciatura clave pa la
correcha normalización del idioma asturianu. Allegáu a les
posiciones sobre la tema de la llingua del desapaecíu Emilio Alarcos y
Josefina Martínez, Villanueva ye una persona bien influyente, como
demuestra el que seya miembru d'instituciones como la Fundación Camilo
José Cela o'l Capítulu español del Club de Roma.

El posicionamientu de Villanueva nel debate sobre la Filoloxía
Asturiana recibió bien de crítiques dende organizaciones como la
Xunta pola
Defensa de la Llingua, pero sigue ensin haber una rempuesta dende les dos
instituciones más importantes qu'afalaben el que se creare la
titulación, la Universidá y
la Xunta Xeneral del Principáu. Anque La Voz de Galicia lu convidare pa falar sobre la LOU, de xuro que nun tendrá problema en responder sobre otros temes que tengan que ver cola universidá en xeneral.