Charla nel Muséu Arqueolóxicu sobre’l poder nel Reinu d’Asturies

La Conseyería de Cultura programa nel Arqueolóxicu una charla sobre’l poder nel Reinu d’Asturies nos actos del 30 aniversariu de la inclusión del prerrománicu na llista de la UNESCO

L’historiador Miguel Calleja Puerta va ufiertar esti xueves, a les 19.30 hores, nel Muséu Arqueolóxicu, la conferencia titulada Escribir na dómina del Reinu d’Asturies: tradiciones visigótiques y construcción del poder rexu. Enmarcada nos actos conmemorativos del 30 aniversariu de la inclusión del prerrománicu asturianu na llista del patrimoniu mundial de la UNESCO, con esta conferencia vuelve a empezar el ciclu programáu pola Conseyería d’Educación y Cultura, cola collaboración de la Universidá d’Uviéu.

Tamién nel Muséu Arqueolóxicu, sede del ciclu de conferencies, ta abierta una esposición qu’amuesa la evolución del paisaxe urbanu y natural qu’arrodia a les xoyes prerromániques. La muestra incluye paneles con testos, fotografíes y planimetríes de Santa María de Naranco, San Miguel de Lliño, Santa Cristina de L.lena, Santuyano, la Cámara Santa de la Catedral d’Uviéu y La Foncalada, toos ellos incluyíos na llista de la UNESCO, amás de San Salvador de Valdediós, monumentu sobre’l que se tán realizando na actualidá les xestiones pa la so inclusión na llista.