Cepi compara la comprensión del asturianu cola del "chinu"

|
Plenu de Siero del 29 d'ochobre del 2020

L'alcalde socialista de Siero entra nel xuegu de VOX y nun inclúi en Plenu una moción de Somos por tar na llingua propia.

"Ye como si mañana ún me la presenta en chinu. Pues chico, yo nun lo entiendo", espresó ayeri Ángel Antonio García González 'Cepi', argumentando razones llegales pa torgala. Asina, encamentó a presentar los testos nestos casos en castellanu y asturianu pa que los ediles de Siero puedan entender l'idioma que falen los sierenses.

"Yo nun puedo restrinxir a nengún conceyal del accesu nin de la comprensión d'un espediente por que nun tea en nenguna llingua oficial", esplicó. Una polémica, la del non entendimientu, que tamién se llevó a la Xunta Xeneral entovía ensin una solución real magar el cambiu del Reglamentu de la Cámara.

Amás, dirixóse a Somos y a Izquierda Xunida pa recriminar que l'usu normal del asturianu nun ye una cuestión "prioritaria y menos nesta situación", pa depués apuntar que'l gobiernu municipal tien "máximu respetu pal asturianu y pa toles llingües".

"Actitú llamentable"

Iniciativa pol Asturianu tres conocer esta intervención de Cepi, aseguró que "ye incomprensible qu’un alcalde de la FSA-PSOE nun almita una moción pola cenciella razón de que tea escrita n’asturianu” y recomendó-y "facer un repasu al programa electoral col que’l PSOE se presentó a les elecciones de mayu de 2019". "Tamos nun momentu de máximu consensu alredor del idioma, sumando voluntaes y dando pasos a favor de la normalización de la llingua asturiana. Nun podemos permitir estes situaciones”, añadió'l coleutivu, qu'ayeri cumplió 9 años.

“L'asturianu nunca foi un problema nel conceyu de Siero. Nin na mesma bendición de los Güevos Pintos, que se fai n’asturianu, como pa qu’agora nun se pueda falar asturianu nun Plenu", siguió'l comunicáu, nel que califiquen l'actitú del primer edil de "llamentable".

La intervención del alcalde al respeuto ye nel 2:28:51.

Contador Estadistiques