Central Llechera invierte nun llaboratoriu en Valencia

La Corporación Alimentaria Peñansanta S.A. (CAPSA) sofita la creación d´una empresa nueva de biotecnoloxía. Biopolis, qu'asina se llama la empresa, ta participada pola empresa llechera asturiana nun 20% mientres que'l restu del accionariáu ta participáu pol Conseyu Superior d´Investigaciones Científiques (40%), pola empresa cotizada en bolsa Natraceutical (25%) y pol fondu de capital riesgu Talde Capital (15%). L'oxetivu de Biopolis ye investigar productos y métodos tecnolóxicos pal sector de l´alimentación, y tamién aplicaciones nos sectores químicu, mediuambiental y farmacéuticu, lo mesmo con aplicación a persones qu'a animales. Anque l'anuncia pue llevar a pensar en grandes llaboratorios, el capital con que s'entama ye de sólo 300.000 euros lo que diz muncho, per un llau, del precuru que se toma anguaño pa invertir perres nel sector tecnolóxicu, y per otru, del pocu interés qu'hebo siempre nel desarrollu y na investigación nesti país.

El proyectu de Biopolis quier entamar la xera pal mes d´abril qu'entra, pa lo que yá tien el preste del Conseyu de Ministros en forma d'autorización pa qu´entame a funcionar la empresa. L´autorización del Estáu ye perimportante porque nesti casu participa un organismu públicu como ye´l CSIC, institución presente nel sector n'Asturies al traviés del IPLA. Sicasí, Biopolis nun va ser una empresa asturiana en cuantes que va asitiase nel Institutu d`Agroquímica y Tecnoloxía d´Alimentos del pueblu valencianu de Paterna. Otra vegada más una empresa de orixe asturianu refuga invertir na so tierra, onde'l Parque Tecnolóxicu d´Asturies o el Parque Tecnolóxicu Municipal de Xixón siguen claramente perbaxo de les sos posibilidaes.