Celorio: “Los productos ecolóxicos son el presente y el futuru”

L’amuesa de cocina de Ramón Celorio, l’animación de Los Sidros y La Comedia na Praça do Rossio y l’actuación de Skanda centraron l’actividá asturiana del vienres nel FIMI de Lisboa. El cocineru emponderó los productos ecolóxicos.

Énte un públicu formáu pola representación institucional de Cangues d’Onís, encabezada pol so alcalde, José Manuel González, estudiantes cangueses d’Erasmus en Lisboa, llugareños y turistes, el xefe de cocina del restaurante Los Arcos, acompañáu de Juan Luis Casero, presentó una bona cantidá de productos asturianos, na so mayor parte de la so zona, ente los que destacaben les verdures, les fabes y la carne de vaca casina y d’Asturiana de los Valles. Asina, ellaboró una serie de platos como fabes con amasueles; sollombu de vaca casina y ‘mar y montaña’, na qu’incluyía trés tipos d’ocla; llombu baxu d’asturiana de los valles con boletus; o un tortu, ente otros. Una bona mestura de sabores que los presentes pudieron prebar al mesmu tiempu que teníen la posibilidá de plantega-y duldes a los cocineros.

Xunto a Celorio y Casero, tamién participó na amuesa de cocina Germán Bernardo Izquierdo, de Coctelería Cuarenta Grados de Cangues d’Onís, que ellaboró seis cócteles inspiraos nos platos fechos polos cocineros. Ente ellos destacó ún de base de sidra, de nome ‘Sidrafizz’, y otru de xelu inspiráu nos Picos d’Europa, ‘Deshielo’.

El xefe de cocina de Los Arcos qu’acudió a Lisboa col oxetivu “dar a conocer los productos tan bonos que tenemos y fomentar la zona”, emponderó nel stand de la estaya ‘Gastronomia e Vinhos Ibéricos’ del Festival Internacional Máscara Ibérica (FIMI) a los productos ecolóxicos, de la güerta canguesa, que “son el presente y el futuru”, aseguró al públicu. Amás, agradeció al Conceyu de Cangues d’Onís la so apuesta por potenciar el mercáu dominicial, dando la posibilidá a los pequeños productores de la zona a vender los sos alimentos y a los veceros acceder a productos de primera calidá.

Güei, al meudía, Asturies va participar otra vuelta en ‘Gastonomia e Vinhos Ibéricos’, nesta ocasión con una degustación de Quesu Gamonéu y sidra asturiana, productos cedíos polos conceyos de Cangues d’Onís y Siero, de manera respeutiva. Amás, va tener llugar la preba de quesos, maridaos con sidra natural, sidra brut, sidra de xelu o Vinu de Calidá de Cangas nes sos variedaes tintu y blancu, dirixida por Lluis Nel Estrada, direutor gastronómicu y de Comunicación Corporativa de Crivencar/Tierra Astur. Ésta taba prevista para ayeri, pero tuvo qu’aplazase por motivos téunicos.

Actuaciones na Praça de Rossio

La Praça de Rossio, epicentru del FIMI, eventu entamáu por Progestur, tuvo ayeri animada por Los Sidros y La Comedia, que compartió los flashes de los turistes y visitantes de la Mostra das Regiões cola mazcarada búlgara Survakari, de la zona de Pernik. Ésta llamó l’atención de los asturianos presentes en Lisboa pol usu que faen d’una especie d’esquila, al igual que la de Valdesoto.

Dientro de la estaya ‘Palco Ibérico’, actuó Skanda énte un públicu animosu nes primeres files que foi medrando mientres trescurría la nueche y avanzaba’l conciertu. El veteranu grupu mierense, acompañáu por Héctor Braga en dellos cantares, prestaron a los presentes cola so apuesta folk-rock en llingua asturiana. Tres ellos, xubieron al escenariu de la Praça de Rossio los gallegos’Cuchufellos’, que cola so divertida puesta n’escena fixeron rir y baillar a los presentes.

Na semeya, Bernardo Izquierdo, Casero y Celorio trabayen baxo l'atenta mirada del alcalde cangués, José Manuel González. Autor de la fotografía: Iván G. Fernández.