Cellero lleva al Teatru Xovellanos la primer representación en llingua asturiana del ‘Lazarillo de Tormes’

L’adaptación al teatru d’una de les obres cumes de la lliteratura castellana va poder sentise per primer vegada n’asturianu. Carlos Alba ‘Cellero’ representa esti xueves, en formatu unipersonal, ‘Llázaro de Tormes’ nel xixonés Teatru Xovellanos.

Cellero ta satisfechu col resultáu de la versión, traducida y ellaborada por él mesmu, yá que la obra "suena mui bien en llingua asturiana. Da la impresión que l'orixinal taba escritu n'asturianu", bromia. El monologuista llevaba dos años trabayando la idea de facer esta obra, aunque la ocurrencia foi muncho antes, depués de ver la representación monolóxica que 'El Brujo' fixera de la obra, d’autoría anónima, entitulada orixinalmente 'La vida de Lazarillo de Tormes y de sus fortunas y adversidades'.

Sobre la torna, señala que'l monólogu "ye un xéneru mui oral y popular", y que'l 'Llázaro' "ye un personaxe del pueblu, un probe home que pasa muncha miseria y fame". "Ye una obra complexa, pero suena popular, nun ye cascante", señala del orixinal. El so trabayu contó cola revisión llingüística y lliteraria del profesor Milio Rodríguez Cueto.

La representación dura una hora y venti minutos, y matiza que, anque "hubo que quitar coses, ye mui fiel al orixinal", y representa "la miseria, la fame y lo mal que lo pasaba la xente nel sieglu XVI", motivu pol que considera qu'esta obra "ye actual". La escenografía será una carreta coles coses del pregoneru, yá que Cellero quixo afondar nesta figura. Como curiosidá, señala que les munches referencies al vinu de la obra orixinal serán nesti casu menciones al vinu de Cangas. La representación va principiar a les 20.30 hores y les entraes tienen un costu de 10 euros.

Ésta será la segunda representación teatral d'un clásicu de la lliteratura castellana n'asturianu. La primera foi la que fixo'l grupu Nun tris del ‘Don Quijote de La Mancha’ de Cervantes pa neños y neñes. El 8 de payares, Cellero llevará ‘Llázaro de Tormes’ al Teatru Prendes de Candás, nesti casu en castellanu y pa los alumnos de Secundaria del institutu llocal, y el día 10, nel mesmu escenariu, n'asturianu y p'adultos.