'Cellero' estrena monólogu na Casa de les Radios de Suares

Va ser nel actu d'entrega del XXI Concursu de Cuentos pola Oficialidá del Asturianu de Bimenes, que llevó Héctor Pérez Iglesias.

‘Que trata de lo que me cuntó’l mio mayestru al dexar l’abadía’ ye'l nome del cuentu col que'l d'Arlós convenció al xuráu conformáu por pol ganador del añu pasáu Pablo Rodríguez Medina –con 'Los restos d'un naufraxu'–, Xulio Vixil y Francisco ‘Paco’ Álvarez xunto col alcalde Aitor García Corte y el téunicu responsable de Cultura, Daniel Cueli, que fixeron les funciones de presidente y secretariu, de manera respeutiva. D'esta forma repitía, seis años depués, como vencedor d'esti concursu de gran tradición que tien un recompensa de 600 euros.

El segundu puestu, con una recompensa de 450 euros, foi pa ‘Enkidu y la eternidá’, de Rubén Magadán, y el terceru, de 300 euros, pa ‘Nun requexu’, d’Armando Gutiérrez Rodríguez. Los trés lleerán les sos creaciones nun actu que va tener como sede'l Muséu Casa de les Radios, en Suares, dende les 19 hores del sábadu.

L’eventu va completase cola actuación del monologuista Carlos Alba, que col so personaxe 'Cellero' va representar un monólogu que ta d’estrena: “La talla 38 o fuera los grilletes de les fañagüetes”. La entrada ye llibre hasta completar aforu.