Celébrase'l Día de les Lletres Asturianes

Les lletres asturianes celebren güei, vienres 4 de mayu, el so día grande. Entidaes como'l Gobiernu asturianu o l'Academia de la llingua Asturiana tienen preparaos pa güei intensos programes d'actos, mientres que la organización cívica Xunta Pola Defensa de la Llingua Asturiana pon la nota reivindicativa organizando la tradicional manifestación a favor de la oficialidá.



Dientro del programa d'actos de la Conseyería de Cultura, güei celébrase'l Día del llibru y el Discu n'Asturianu, una iniciativa qu'afala, con descuentos, l'alquisición de llibros y discos n'asturianu. Como actos institucionales centrales del día, a les 12 va facese na Biblioteca d'Uviéu la presentación de la Guía Bibliográfica "Quien ye quien na narrativa asturiana" y del "Archivu Dixital de la Lliteratura Asturiana".

Pela so parte, l'Academia de la Llingua Asturiana celebra nel teatru Campoamor d'Uviéu el Día de les Lletres. Los actos van entamar a les 20 hores y van tener como principal novedá'l nomamientu como nuevu Miembru de Númberu de l'Academia de la filologa y escritora Marta Mori d'Arriba. L'actu institucional va abrir cola participación de la gaitera Andrea Fernández Joglar, pa pasar darréu a la Xunta Estraordinaria de l'Academia de la Llingua Asturiana, col tradicional discursu institucional de la Presidenta. El piesllu musical va correr al cargu del grupu folk Tejedor.

Enantes del actu institucional de l'ALLA, la Xunta pola Defensa de la Llingua Asturiana convoca, como ye vezu, la tradicional manifestación que coincide cola celebración del Día de les Lletres Asturianes. Col lema "L'Asturianu Llingua Oficial" la marcha va salir a les 19:00 de la Estación del Norte d'Uviéu. La organización de defensa del asturianu sorraya la importancia d'esta convocatoria pola cercanía de les elecciones y pola inminencia del procesu de reforma del estatutu d'autonomía asturianu.