CC.OO reconoz contactos col Gobiernu pa la reforma de pensiones

El secretariu de Comunicación de CC.OO., Fernando Lezcano, reconoció que ta habiendo contactos ente los sindicatos y el Gobiernu pa buscar un acuerdu "razonablemente asumible" en materia de pensiones.

Sicasí, negó que diches conversaciones produxeren hasta agora "averamientos" ente les posiciones d'ambes partes.
  
"Nun ta habiendo averamientos, ta habiendo esploraciones y prestábamos pensar que d'esos contactos puea salir algo que seya razonablemente asumible pa toles partes, pero ye aventurao dicir qu'esi ye'l resultáu que vamos llograr a lo último", dixo.
  
Lezcano, en declaraciones a la cadena COPE recoyíes po Europa Press, recordó que, pa los sindicatos, "la llinia colorada" d'esta negociación ye l'allargamientu obligatoriu de la edá de xubilación a los 67 años, midida que, de facese, podría marcar la diferencia ente dir o non a una nueva güelga xeneral.
  
"Va haber güelga xeneral o non en función del resultáu que puea algamar nestos contactos. Si'l Gobiernu accede a modificar delles de les sos pretensiones, pue haber perfectamente un acuerdu. Si'l Gobiernu plantégase les negociaciones n'ares de buscar un acuerdu como los que se cuayaron nel pasáu nun va haber güelga xeneral, pero si persiste en qu'esto ye una cuestión de convencemos, como diz el presidente del Gobiernu, vamos tener un problema", esplicó.
  
Unidá sindical
Lezcano aseguró que, hasta la fecha, esiste unidá sindical ente UXT y CC.OO. al respecto de la reforma de les pensiones y cree que nun hai nada qu'apunte a que nun la vaya siguir habiendo.