CC.OO presenta un plan pa descontaminar Uviéu

El sindicatu CC.OO. presentó esta mañana la Estratexa Local del Aire, un plan col que llimpiar l'aire de la capital asturiana que va presentase oficialmente al Conceyu y que ta centráu en midíes sobre'l tresporte y el tráficu.

Ente les midíes que propón el sindicatu ta la creación de Zones de Baxa Emisión nel centru de la ciudá, onde se torgaría la entrada de vehículos contaminantes. Otramiente, y p'afalar l'usu del tresporte públicu, el sindicatu propón acutar más carriles pal autobús, qu'amás tendría de ser más llimpiu al traviés del emplegu de vehículos con combustibles menos contaminantes que'l gasoil, defendiendo CCOO la creación d'una "flota verde" na que tamién tendríen de tar los vehículos de los estremaos servicios del conceyu. La creación d'una rede d'aparcamientos a la entrada de la ciudá sedría una de les midíes empobinaes a afalar l'usu del tresporte públicu, mientres qu'a títulu particular propónse afalar l'emplegu de la bicicleta, l'usu compartíu del coche particular y la creación de ventayes fiscales pa los que merquen coches poco contaminantes, casu de los vehículos híbridos gasolina / electricidá.

CCOO propón igualmente delles midíes empobinaes a les industries del conceyu y referentes a la mengua na producción de residuos y l'emplegu por parte d'estes de materies primes y sustancies menos peligroses. Pa controlar tou esti plan, CCOO propón la creación d'un conseyu del mediu ambiente con participación de les autoridaes y tolos axentes sociales.

José Manuel Prieto, secretariu xeneral de CCOO d'Uviéu, criticó l'actitú del Conceyu d'Uviéu, que, con pertenecer a la Rede de Ciudaes pol Clima, diz que nun ta faciendo abondo pola calidá del aire, polo que xustificó la presentación del plan en cuantes que "ye importante que'l conceyu apaute un plan estratéxicu pa menguar la emisión de gases contaminantes".