CCOO esixe una investigación sobre les causes de los últimos accidentes llaborales n'Asturies

El secretariu de Salú Llaboral de CCOO d'Asturies, Jeremías Dos Santos Zapico, dixo que la muerte d'un trabayador rexistrada'lpasáu vienres y los "graves" accidentes llaborales d'estos díes n'Asturies, han tener les sos causes, y "tienen d'investigase".
CCOO esixe'l "cumplimientu íntegru" de la Llei de Prevención de Riesgos Llaborales y afirma que "si nun s'aplica la mesma poco vamos poder facer más que condenar los accidentes".


Al xuiciu de CCOO, la siniestralidá llaboral ta incidiendo de manera "dramática" y "mui preocupante" nel sector de la construcción n'Asturies. Santos Zapico señaló que cola víctima mortal de güei, un trabayador que morrió al cayer dende 20 metros d'altura en Llugones, s'eleven a seis el númberu de muertos n'accidente llaboral na construcción no que va d'añu, cuando nel 2006 per estes mesmes feches sólo se rexistrara ún.

Santos Zapico esplicó también que nos siete primeros meses del 2007, en dichu sector produxéronse más víctimes mortales, seis, que demientres tol añu pasáu, cinco.
Pero non sólo los accidentes con víctima mortal aumentaron no que llevamos d'añu, según CCOO. Asina, Santos Zapico recordó qu'ayeri mesmu se rexistraron dos accidentes nel metal, sector qu'al igual que la construcción tien niveles mui alarmantes de siniestralidá llaboral, ún con tres firíos en Naval Xixón, al españar una tubería, y otru nel Parque Empresarial d'Avilés, onde un operariu sufrió una fractura cranial al golpealu una pieza cuanto taba realizando'l so trabayu.