CC.OO califica de "éxitu" la fuelga del carbón

CC.OO considera que la fuelga xeneral nel sector del carbón convocada pa esti xueves pol sindicatu "foi un éxitu", a la vista de qu'en dellos centros de trabayu'l siguimientu foi "cercanu al 100%", según un comunicáu del sindicatu.

"La satisfacción ye mayor si se tien en cuenta que se trata d'un paru que convocó en solitario'l primer sindicatu del país y qu'hailu que trabayó pa evitar que fuera un éxitu", asegura'l sindicatu.
  
Col siguimientu de la fuelga, los trabayadores "refugaron la pasividá que dende hai meses vien mostrando'l Gobiernu ante la crítica situación que traviesa'l sector" y esixeron "una solución satisfactoria pa les comarques mineres", afirma'l sindicatu.
  
Nel sector mineru de Castiella y Llión, el siguimientu de la fuelga foi "prácticamente total", mientres que nes empreses Uminsa, Coto Minero Cantábrico y el Grupu Viloria "cerca del 100%" de los trabayadores nun se presentaron al so puestu de trabayu, asegura.
  
"Bien asemeyáu foi'l siguimientu del paru na minería privada asturiana, mientres que na pública la fuelga secundóla'l 60% de el trabayadores", añade'l sindicatu.

Convocatoria unillateral
Nel so comunicáu, CC.OO llamenta que, pese a "la delicada situación que vive'l sector", otros sindicatos mineros "miraron pa otru llau sin apoyar una fuelga que lo único que busca son soluciones".
  
En tou casu, realiza un llamáu a estos sindicatos pa "sumar esfuerzos" y "refugar al unísonu les agresiones que los sos trabayadores tán recibiendo".
  
Mientres les concentraciones d’esti xueves, los manifestantes esixeron al Executivu que fuerce a la Comisión Europea a modificar la so propuesta de reglamentu sobre'l futuru del sector, nel que s'establez 2018 como l'añu en que tendrán de desapaecer les ayudes.
  
El sindicatu protesta amás pol retrasu na puesta en marcha del decretu del carbón y pola proliferación dientro del sector d'espedientes de regulación d'empléu, qu'afecten a más de trés mil trabayadores.