CC OO, UXT y USO denuncien que les empreses descuiden les midíes de seguridá nel trabayu pola crisis

Esti xueves, los sindicatos CC OO, UXT y USO salieron a la cai con motivu del Día Internacional de la Salú y la Seguridá nel Trabayu. Éstos denunciaron que les emprese “baxaron la guardia” nes midíes de seguridá por mor de la crisis.
 
Los tres sindicatos movilizaron a les sos bases pa demandar más seguridá nel trabayu y aprovecharon la ocasión pa recordar a les cuatro víctimes mortales del 2011 y pa señalar que “les empreses relaxáronse” no que respeuta a les midíes de seguridá nel trabayu. ‘Con sindicatos el trabajo es más seguro. Por el pleno empleo, sin renunciar a la salud laboral y seguridad en el trabajo' foi’l lema de la pancarta de la manifestación que percorrió les cais d’Uviéu y qu’axuntó a dellos centenares de persones.
 
Esther Alonso, responsable de Salú Llaboral de la Unión Xeneral de Trabayadores (UXT), destacó qu’anque descendiera’l númberu d’accidentes llaborales, “por desgracia, nun se debe a que se tomaren les midíes preventives necesaries nes empreses”. P’Alonso, “anque la patronal lo niegue”, los empresarios tán presionando cada vez más a los trabayadores pa que nun garren baxes llaborales “llegando incluive a amenazalos con despidos”. Tamién esplicó que la salida del mercado laboral de los trabayadores temporales o l’aumentu del paru en sectores como la construcción son otros de los factores que faen que baxara l’accidentalidá.
 
Pela so parte, Jesús Alonso, de Comisiones Obreres (CO OO) coincidió Alonso en destacar que “nesti momentu de crisis nun solo ta viéndose afectáu l’emplegu, sinón la calidá de los emplegos que queden”. Por ello, reivindicó’l cumplimientu de los derechos de los trabayadores.