CC OO d’Enseñanza, FETE-UXT y SUATEA demanden al Gobiernu “contundencia y dilixencia” pa defender la especialidá docente

El 3 de febreru va aconceyar la Permanente del Conseyu Escolar del Estáu y nella trataránse delles enmiendes rellacionaes cola negativa del ministeriu de crear la especialidá de Llingua Asturiana y Gallego-Asturiano. CC OO d’Enseñanza, FETE-UXT y SUATEA demanden al Gobiernu “contundencia y dilixencia” pa garrar fuercia a la hora de tratar esta cuestión.

Estos trés sindicatos educativos tán acabantes d’asoleyar un comunicáu conxuntu nel que señalen “qu’ésta ye una oportunidá única pa pañar apoyos qu’algamen que’l Gobiernu –estatal– atienda esta demanda”, polo que soliciten a la conseyera d’Educación, Cultura y Deporte, Ana González, un conceyu “de calter urxente” pa tresllada-y la necesidá de poner medios pa sacar alantre la especialidá. “Ye imprescindible que paralelamente a les xestiones que fagamos miembros de la comunidá educativa, el Gobiernu asturianu y, especialmente la Conseyería d’Educación, actúen cola contundencia y dilixencia necesaries que rique esta cuestión”, afirmen.

Na Conferencia Sectorial de Educación del miércoles pasáu conocióse la decisión del ministeriu de dexar fuera la especialidá de Llingua Asturiana y Gallego-asturiano nel proyeutu del Real Decretu de les Especialidaes Especialidaes Docentes d’Educación Secundaria. “Pa la comunidá educativa asturiana ye un momentu de gran trescendencia en tanto que nos xugamonos la creación de la especialidá”, una reivindicación histórica “que supón dignificar l’enseñu d’estes asignatures y igualar les condiciones llaborales del profesoráu que les imparte a les del restu de docentes”, apunten los sindicatos. Na Permanente del Conseyu Escolar del Estáu, que yá se pronunciara a favor de la demanda de la comunidá educativa asturiana en setiembre, va tratase otra vuelta l’asuntu’l día 3 y, según anunció ayeri Xosé Antón González Riaño, vicepresidente de l’Academia de la Llingua Asturiana, al apoyu de los sindicatos va sumase’l de les asociaciones d’estudiantes y de padres y madres.