CC OO Enseñanza unvía “un mensaxe d’ánimu a toles persones que trabayen pola nuesa llingua” con motivu de la Selmana de les Lletres

El poema 'Palabres', de Lourdes Álvarez, protagoniza'l videu que Comisiones Obreres (CC OO) Enseñanza grabó con motivu de la XLI Selmana de les Lletres Asturianes que debía celebrase estos díes. El sindicatu pretende asina unviar "un mensaxe d’ánimu a toles persones que trabayen pola nuesa llingua y la nuesa lliteratura".

Lluís Gabriel Antuña ye l’encargáu d’abril la pieza con estes declaraciones, a la que sigue María Rodríguez afirmando que “tamos pola llingua asturiana”. Darréu Xavi Cayado, Aida Escudero, Alfonso López Alfonso y Lluis Aique Iglesias reciten el poema d’Álvarez, del que llee los primeros y últimos versos la secretaria de Llingua Asturiana y Gallego-asturiano del sindicatu, Marta Mori.

Por último, Liliana Díaz calca en que “tamos pola oficialidá”. La XLI Selmana de les Lletres Asturianes debía de celebrase estos díes, pero la crisis sanitaria pola pandemia de COVID-19 obligó a aplazala a la serona, siendo les feches nueves afitaes del 28 de setiembre al 2 d’ochobre, día nel que l’Academia de la Llingua Asturiana entamará’l XLI Día de les Lletres Asturianes.