CC OO Enseñanza súmase al manifiestu que demanda una RTPA “al serviciu d’Asturies"

Coleutivos nuevos sumáronse al documentu ‘Cinco puntos por unos medios públicos al serviciu d’Asturies’, entamáu pola XDLA y presentáu hai poco más d’un mes na sede de l’ALLA. El Sindicatu d'Enseñanza de CC OO d'Asturies ye ún d’ellos.

Tamién roblen esti manifiestu l’Asociación Lázaro Cárdenas, la Banda Gaites Castrillón y la Unión d’Actores d’Asturies, aumentando asina hasta 30 el númberu d’organizaciones que demanden que la llei nueva que va regular la Radio Televisión del Principáu d’Asturies tenga en cuenta cinco puntos “irrenuciables”:

• RTPA tien qu’ufrir un serviciu públicu pa la sociedá asturiana al traviés d’una programación de calidá nes llingües propies d’Asturies, plural y respetuosa coles audiencias, con conteníos empobinaos al interés públicu y de producción propia, asumiendo un rol compensatoriu d’otres cadenes públiques o privaes.
• RTPA tien que cumplir l’oxetivu fundamental d’impulsu y normalización del asturianu y del gallego-asturianu.
• RTPA tien que ser exemplar nel so compromiso colos elementos fundamentales y actuales de la cultura asturiana.
• RTPA tien que ser un referente nel panorama audiovisual asturianu, convirtiéndose nel principal impulsor del mesmu.
• En resume, RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y promoviendo una industria audiovisual que garantice la producción d’estos conteníos.

Completen la llista d’organizaciones que sofiten el documentu, amás de la Xunta pola Defensa de la Llingua Asturiana (XDLA) y l’Academia de la Llingua Asturiana (ALLA), l’Asociación Cultural Rapalacóis, l’Asociación de Trabayadores pola Normalización Llingüística, Ástura, Atenéu N’Alfoz, Banda Gaites Ribeseya, Colectivo Trafego, Conceyu Universitariu pol Asturianu, Conseyu de la Mocedá del Principáu d’Asturies, Conseyu de la Mocedá de Xixón, Corriente Sindical d’Izquierda (CSI), Ensame Xuvenil Trisquel, Foroescena, Fundación Belenos, Fundación Caveda y Nava, Grupu de Baille Tradicional San Félix de Candás, Iniciativa pol Asturianu, Producciones Nun Tris, Reciella, Sociedá Cultural Xixonesa, Softastur, Sindicatu Unitariu Autónomu de los Trabayadores de la Enseñanza d’Asturies (SUATEA), Xeira, Xunta Estudiantil Asturiana y Xunta Moza. El testu completu ta disponible nel blogue ‘Cinco puntos por unos medios al serviciu públicu d’Asturies’ y toles entidaes que deseen sofitar el manifiestu pueden facelo al traviés del corréu electrónicu 5puntosxrtpa@gmail.com.

Diez propuestes pa visibilizar la Selmana de les Lletres nel ente públicu

La XDLA tamién unvió recién a Política Llingüística y a la direición del ente públicu de comunicación el documentu ‘Protocolu pa la visibilidá de la Selmana de les Lletres en RTPA’. Ésti consta de diez propuestes qu’ayudaríen “a visibilizar les actividaes y la llingua propia na emisora”, amosando asina un compromisu pa col idioma. Nel testu, la organización demanda un bon tratamientu nos informativos, un actu simbólicu na RPA pal Día de les Lletres Asturianes, la emisión de los actos entamaos pol Gobiernu y l’Academia de la Llingua Asturiana a lo llargo de la Selmana, un especial de ‘Sones’ o programación infantil n’asturianu, ente otres suxerencies.

A esti documentu súmase’l pidimientu anterior de que se festexe la Selmana de les Lletres Asturianes, qu’esti añu ta dedicada al cómic, cola emisión d’una película d’animación n’asturianu. La XDLA recuerda que la Federación d’Organismos de Radio y Televisión Autonómicos (FORTA), a la que pertenez RTPA, tien los derechos d’emisión de siete filmes d’animación de ‘Astérix’, personaxe que fala asturianu na so aventura última en cómic con un ésitu pergrande en ventes (2.000 exemplares), asina como d’otres basaes en series de ‘anime’ xaponeses como ‘Dragon Ball’, ‘Doraemon’ o ‘El detective Conan’. “Esti apueste pola emisión d’una película d’animación n’asturianu supondría defender la tresmisión xeneracional, dalgo pa lo que cuadra mui bien una xornada como la Selmana de les Lletres, onde la Dirección Xeneral de Política Llingüística y la TPA tienen que collaborar pa da-y la mayor visibilidá posible”, apunten dende’l coleutivu cívicu.