CC OO denuncia que la contratación de profesoráu d'asturianu ye menor a la demanda

El sindicatu critica "una previsión deficiente" por parte de la Conseyería d'Educación y "l'aplicación de criterios d'aforru".

"El cursu entama con una contratación de profesoráu de Llingua Asturiana insuficiente pa satisfacer les necesidaes de los centros educativos. La dotación de personal docente fecha pola Conseyería d’Educación nun respuende nin a los pidimientos de los centros nin a la matrícula rexistrada ente xunu y setiembre", denuncia Comisión Obreres (CC OO) Enseñanza, que recuerda que la situación actual supón un incumplimientu de la Llei de Promoción y Usu del Bable/Asturianu.

La falta de previsión y l'aplicación de criterios d'aforru nes contrataciones por parte d'Eduación provoca esta problemática, albidra'l sindicatu. "La mayoría de los centros afectaos por esta situación solicitaron una xornada completa de Llingua Asturiana, pero la Conseyería d’Educación concedió-yos media plaza. Nel casu concretu d’un centru, la previsión yá contemplaba 18 hores de clase, que son les que da davezu un docente de Secundaria trabayando a xornada completa", esplica.

Los problemes cola previsión de plantiyes tamién apaecen na etapa d’Educación Primaria, "onde denegaron xornaes completes a los colexos que queríen ampliar la ufierta de Llingua Asturiana a la Educación Infantil". Dellos docentes treslladaron a CC OO Enseñanza informaciones sobre la creación de grupos d'esta área que superaben la ratio máxima afitada pola llei, "una práutica que respuende tamién a la intención d’axustar los contratos a medies xornaes".

Según les cifres que manexa esti sindicatu, el porcetaxe de medies xornaes algama'l 81,66 por cientu en Primaria y el 95,77 por cientu en Secundaria na primer axudicación.

El presidente Adrián Barbón y la conseyera Carmen Suárez Suárez xueguen con unos escolinos esta mañana mientres la visita al Colexu Rural Agrupáu de Villayón con motivu de la inauguración oficial del cursu escolar. Semeya obra d'Armando Álvarez.