Caxastur paró

Los sindicatos CCOO y CSICA, mayoritarios na entidá financiera asturiana, na que tienen ente los dos el 57% de la representación, teníen convocada p'ayeri la primer huelga na historia de Caxastur. A la convocatoria nun quixeron apautase los sindicatos UGT y USO, que nun taben d'alcuerdu coles reivindicaciones que se facíen. Pa los convocantes, hai qu'igualar los desfases de sueldos (hasta'l 40%) ente los trabayadores más antiguos y los que tan acabantes d'entrar a la empresa. Otres reivindicaciones yeren l'aumentu de la plantilla y la mengua de la xornada llaboral. Tamién dicen los convocantes que dende la entrada na dirección de Manuel Menéndez, ta imponiéndose un modelu de rellaciones llaborales peor que'l que teníen primero de la llegada del doble presidente de Caxastur y HC. Otramiente, a UXT y USO abúlten-yos descomanaes les reivindicaciones de los otros dos sindicatos, en cuantes que fadría falta doblar el gastu en sueldos de la empresa pa facer lo que piden.La fuelga tuvo un seguimientu desigual, ensin que sindicatos y dirección dean datos nin medio asemeyaos de cuantos trabayadores pararon.Coincidiendo cola fuelga, Caxastur anunció tamién el beneficiu de los 9 primeros meses del añu, que ye de 63 millones d'euros, el 9,8% más que nel añu 2001. La entidá financiera dio esti añu el 28,4% más de créditos hipotecarios más que nel 2001, xestiona'l 10% más en depósitos, el 9 en planes de pensiones y el 7,1 en fondos d'inversión.